BAKI,TurkicWorld,Yusif Şərifzadə
Oman və Yaponiya Hörmüz boğazında gəmilərin sərbəst və təhlükəsiz hərəkətinin təmin edilməsi üçün beynəlxalq səylərin təcili şəkildə gücləndirilməsinin vacibliyini bildiriblər. Tərəflər strateji su yolunda gəmiçiliyin beynəlxalq hüquqa uyğun şəkildə təmin edilməli olduğunu vurğulayıblar.
TurkicWorld xəbər verir ki, Omanın xarici işlər naziri Bədr bin Həməd əl-Busaidi paytaxt Məsqətdə Yaponiyanın xarici işlər naziri Toşimitsu Motegi ilə görüşüb. Danışıqların əsas mövzularından biri Hörmüz boğazındakı mövcud vəziyyət və beynəlxalq gəmiçiliyin təhlükəsizliyinin təmin edilməsi olub.
Bədr bin Həməd əl-Busaidi Hörmüz boğazından təhlükəsiz keçidin bütövlükdə bölgənin təhlükəsizliyi və rifahı ilə birbaşa bağlı olduğunu bildirib. Onun sözlərinə görə, strateji su yolunda sabitliyin təmin edilməsi yalnız Körfəz ölkələri üçün deyil, daha geniş bölgə üçün əhəmiyyət daşıyır.
Oman tərəfi Hörmüz boğazında sərbəst gəmiçiliyin beynəlxalq hüquq normalarına uyğun təmin edilməsinin vacibliyini vurğulayıb. Məsqət böhranın həlli üçün diplomatik səylərin davam etdirilməsinin tərəfdarı olduğunu bildirib.
Yaponiyanın xarici işlər naziri Toşimitsu Motegi Hörmüz boğazında gəmiçilik böhranının həlli istiqamətində Omanın oynadığı rolu yüksək qiymətləndirib. O, Məsqətin diplomatik səylərinin bölgədə sabitliyin qorunması baxımından mühüm olduğunu qeyd edib.
Motegi Yaponiya ilə Oman arasında bu istiqamətdə əlaqələndirmənin daha da gücləndiriləcəyini bildirib. Tokio Hörmüz boğazında gəmilərin sərbəst və təhlükəsiz hərəkətinin bərpasında maraqlı olduğunu vurğulayıb.
Yaponiya tərəfi Bab əl-Məndəb boğazında da təhlükəsiz gəmiçiliyin təmin edilməsinin vacibliyini qeyd edib. Tərəflər Hörmüz və Bab əl-Məndəb kimi mühüm dəniz yollarının açıq və təhlükəsiz saxlanılması üçün beynəlxalq əməkdaşlığın gücləndirilməsini zəruri hesab edirlər.
