Bakı. TurkicWorld
ABŞ-nin müdafiə naziri Pit Heqset bildirib ki, Prezident Donald Tramp İranın nüvə silahına sahib olmasının qarşısını almaq üçün bütün zəruri tədbirləri görmək məsuliyyəti daşıyır.
TurkicWorld xəbər verir ki, Heqset bu barədə ABŞ Quru Qoşunları Assosiasiyasının illik toplantısında keçirilən müzakirələr zamanı danışıb.
Nazir vurğulayıb ki, Vaşinqton İranın nüvə silahı əldə etməsinə imkan verməmək mövqeyində qətiyyətlidir.
Heqset çıxışı zamanı müharibə əleyhinə etirazçıların müdaxiləsi ilə də üzləşib. Etirazçılar onun çıxışını bir neçə dəfə yarımçıq kəsərək ABŞ-nin hərbi siyasətinə qarşı şüarlar səsləndiriblər.
Nümayişçilərdən biri müdafiə nazirini hərbi cinayətlər törətməkdə ittiham edib, digəri isə onu qorxaqlıqda günahlandırıb.
Etirazlara cavab verən Heqset İranın heç vaxt nüvə silahına sahib olmayacağını bildirib.
ABŞ müdafiə naziri çıxışı zamanı Hörmüz boğazındakı vəziyyətə də toxunub. O, ABŞ Silahlı Qüvvələrinin bu strateji dəniz keçidinə nəzarət etdiyinə dair əvvəlki iddiasını təkrarlayıb.
Heqsetin açıqlamaları ABŞ ilə İran arasında gərginliyin davam etdiyi bir vaxtda səsləndirilib.
