BAKI,TurkicWorld,Yusif Şərifzadə
İraq parlamentinin sədri Heybət əl-Həlbusi iranlı həmkarı Məhəmməd Baqir Qalibafla görüşündə Hörmüz boğazı vasitəsilə həyata keçirilən neft ixracında İraq üçün xüsusi yanaşmanın tətbiq edilməsini istəyib. İraq tərəfi bu tələbi bölgədə baş verən hadisələrin ölkə iqtisadiyyatına təsiri ilə əsaslandırıb.
TurkicWorld xəbər verir ki, İraq Xəbər Agentliyinin məlumatına görə, Heybət əl-Həlbusi İraqın bölgədəki son hadisələrdən ən çox zərər çəkən ölkələr sırasında olduğunu bildirib. O, Tehranı iki ölkə arasındakı münasibətlərin xüsusiyyətlərini nəzərə almağa və İraqın iqtisadi maraqlarının qorunmasına şərait yaratmağa çağırıb.
Əl-Həlbusi Hörmüz boğazından neft ixracının İraq iqtisadiyyatı üçün xüsusi əhəmiyyət daşıdığını vurğulayıb. O, İran tərəfinin boğazdakı vəziyyətlə bağlı qərarlar qəbul edərkən Bağdadın iqtisadi maraqlarını nəzərə almasını istəyib.
İraq iqtisadiyyatı neft ixracından əldə edilən gəlirlərdən böyük dərəcədə asılıdır. Buna görə də bölgədə dəniz daşımalarına maneə yaradan hərbi və siyasi gərginlik Bağdad üçün ciddi iqtisadi təhlükə hesab olunur.
Məhəmməd Baqir Qalibaf isə İranın İraqla əməkdaşlığı daha da genişləndirməkdə maraqlı olduğunu bildirib. O, xüsusilə ticarət və iqtisadi sahələrdə əlaqələrin inkişaf etdirilməsinin vacibliyini vurğulayıb.
Qalibaf Tehranla Bağdad arasında daha əvvəl imzalanmış razılaşmaların həyata keçirilməsinin davam etdirilməsinə də tərəfdar olduqlarını bildirib. İran tərəfi iki ölkə arasında iqtisadi əlaqələrin genişləndirilməsi üçün mövcud imkanlardan istifadə etməyə hazır olduğunu vurğulayıb.
Görüş Qalibafın İraqa üçgünlük rəsmi səfəri çərçivəsində keçirilib. Səfər zamanı İran və İraq arasında siyasi, iqtisadi və parlamentlərarası əməkdaşlığın müxtəlif istiqamətlərinin müzakirəsi nəzərdə tutulur.
