BAKI,TurkicWorld,Yusif Şərifzadə
Livan Prezidenti Cozef Aun ölkənin cənubunda yaranan hər hansı təhlükəsizlik boşluğunun İsrailə hücumlar üçün bəhanə verdiyini və milli suverenliyi təhdid etdiyini bildirib.
TurkicWorld xəbər verir ki, Aun Beyrut yaxınlığındakı Baabda prezident sarayında yüksək səviyyəli hərbi və təhlükəsizlik rəsmiləri ilə keçirdiyi iclasda Livanın ərazi bütövlüyünün qorunmasının vacibliyini vurğulayıb.
Livan prezidentinin sözlərinə görə, ölkənin cənubunda təhlükəsizlik boşluğunun yaranması hücumlar üçün bəhanə olmaqla yanaşı, milli suverenliyin pozulmasına gətirib çıxarır.
Aun Nəbatiyyə və İsrailin işğalı altında olmayan digər ərazilərin təhlükəsizliyinin vahid Livanın təhlükəsizliyinin ayrılmaz hissəsi olduğunu bildirib.
Prezidentin açıqlaması İsrail qüvvələrinin Livanın cənubunda özünün elan etdiyi “təhlükəsizlik zonası”nda fəaliyyətini davam etdirdiyi və bölgədə gərginliyin yenidən artdığı bir vaxtda səslənib. Son günlər Nabatiyə və ətraf ərazilərə İsrail zərbələri endirilib.
Aun daha əvvəl də İsrailin cənubi Livandakı hücumlarını pisləyərək, bölgədəki eskalasiyanın ölkənin suverenliyinə və sabitliyinə təhlükə yaratdığını bildirib.
Bununla yanaşı, Livan ordusunun Nəbatiyyədə mövcudluğunu artırdığı bildirilir. Aunun son çıxışı dövlət təhlükəsizlik qüvvələrinin cənubda daha fəal rol oynamasının vacibliyini önə çıxarır.
