BAKI,TurkicWorld
Livanın Baş naziri Nəvaf Salam Vaşinqtonda ABŞ dövlət katibi Marko Rubio ilə görüşündə İsraillə əldə olunmuş çərçivə razılaşmasının tam şəkildə həyata keçirilməsinə çağırıb. O bildirib ki, razılaşmanın icrası Livanın bütün ərazisi üzərində suverenliyinin tam bərpasına gətirib çıxarmalıdır.
TurkicWorld xəbər verir ki, Nəvaf Salam üçtərəfli çərçivənin icra mərhələsinə keçilməsinin, qarşılıqlılıq və mərhələli həyata keçirmə prinsiplərinin konkret addımlara çevrilməsinin vacibliyini vurğulayıb.
Livan Baş nazirinin dəftərxanasının açıqlamasına görə, atılacaq addımlar İsrail qüvvələrinin Livan ərazisindən tam çıxarılmasına və ölkə daxilində silahların yalnız dövlətin nəzarətində olmasına gətirib çıxarmalıdır.
Salam razılaşmanın icrasına nəzarət etmək və tərəflərin üzərinə götürdüyü öhdəliklərə əməl olunmasını təmin etmək üçün etibarlı yoxlama mexanizminin yaradılmasını da istəyib.
Baş nazir, həmçinin Livan ordusuna ABŞ dəstəyinin davam etdirilməsinin əhəmiyyətini vurğulayıb. Livan ordusunun qarşısında “Hizbullah”ın silahsızlaşdırılması ilə bağlı mürəkkəb vəzifənin dayandığı bildirilir.
