BAKI,TurkicWorld,Yusif Şərifzadə
İsrail Baş naziri Benyamin Netanyahunun sağçı tərəfdaşları Qəzza zolağında yaşayan fələstinlilərin köçürülməsi ilə bağlı çağırışları yenidən gündəmə gətiriblər. Açıqlamalar İsraildə keçiriləcək seçkilər ərəfəsində verilib və Fələstin tərəfdə yeni məcburi köçürülmə qorxularını artırıb.
TurkicWorld xəbər verir ki, İsrailin milli təhlükəsizlik naziri İtamar Ben-Qvir Qəzza əhalisinin “könüllü köçü” adı altında çıxarılmasını nəzərdə tutan yeddiillik plan təqdim edib. O, gələcək hökumətdə bu məsələ ilə məşğul olacaq ayrıca nazirliyin yaradılmasını təklif edəcəyini bildirib.
Ben-Qvir Qəzzadan köçürülməni müharibənin həlli yollarından biri kimi təqdim edib və bəzi ölkələrin mümkün qəbul məntəqələri kimi nəzərdən keçirildiyini bildirib.
Onun rəhbərlik etdiyi “Yəhudi Gücü” partiyası Türkiyə, Efiopiya və Konqo Demokratik Respublikasının mümkün istiqamətlər arasında olduğunu açıqlayıb.
HƏMAS hökumətinin media idarəsinin rəhbəri İsmayıl əs-Səvabtə bu çağırışlara cavab olaraq fələstinlilərin öz torpaqlarına bağlı olduğunu və bu cür təhdidlərdən qorxmayacağını bildirib.
İsrailin müdafiə naziri İsrael Kats da daha əvvəl Qəzza üçün “bu köç olmadan real həll yolunun olmadığını” iddia edib. O, mümkün köçürülmənin dəniz, hava və digər yollarla həyata keçirilə biləcəyini söyləyib.
İsrail rəsmiləri Qəzza əhalisinin zorla çıxarılmasını planlaşdırmadıqlarını bildirirlər və bu prosesi “könüllü köç” kimi təqdim edirlər. Lakin fələstinlilər və beynəlxalq dairələr bu çağırışların yeni “Nəkbə” qorxusunu artırdığını qeyd edirlər.
