BAKI,TurkicWorld,Yusif Şərifzadə
ABŞ ilə İran arasında hazırda heç bir danışıq və ya müzakirənin aparılmadığı, eyni zamanda yaxın dövr üçün belə bir görüşün planlaşdırılmadığı bildirilib. Bu barədə adı açıqlanmayan Ağ Ev rəsmisi məlumat verib.
TurkicWorld xəbər verir ki, Ağ Ev rəsmisi ABŞ Prezidenti Donald Trampın daha əvvəl səsləndirdiyi mövqeyi təkrarlayaraq Vaşinqtonla Tehran arasında hazırda diplomatik danışıqların olmadığını bildirib.
“Prezident Trampın dediyi kimi, hazırda İranla heç bir danışıq və ya müzakirə aparılmır və belə bir görüş də planlaşdırılmayıb”, – Ağ Ev rəsmisi bildirib.
Rəsmi, həmçinin ABŞ-nin tətbiq etdiyi dəniz mühasirəsinin qüvvədə qaldığını və bunun təsirli şəkildə davam etdirildiyini iddia edib.
Onun sözlərinə görə, Hörmüz boğazı hazırda açıqdır və burada yerləşdirilmiş dəniz minaları ya təmizlənib, ya da məhv edilib.
Ağ Ev rəsmisi dəniz minalarının hansı ərazilərdən təmizləndiyi və əməliyyatların nə vaxt başa çatdığı barədə əlavə məlumat verməyib.
Açıqlama regionda diplomatik vasitəçilik səylərinin davam etdiyi bir vaxtda verilib. Son günlər Pakistan və Oman ABŞ ilə İran arasında gərginliyin azaldılması və diplomatik təmasların bərpası istiqamətində fəallığını artırıb.
Bununla belə, Ağ Evin son mövqeyi Vaşinqton və Tehran arasında hazırda birbaşa danışıqlar prosesinin başlamadığını göstərir.
