BAKI,TurkicWorld,Yusif Şərifzadə
Pakistanın daxili işlər naziri Möhsin Rza Naqvi İran və ABŞ arasında davam edən qarşıdurmanın həlli istiqamətində vasitəçilik səyləri fonunda Tehrana səfər edib.
TurkicWorld xəbər verir ki, İranın "Mehr" agentliyinin məlumatına görə, Möhsin Rza Naqvi İran rəsmiləri ilə görüşlər keçirmək üçün paytaxt Tehrana çatıb.
İranın rəsmi IRNA agentliyi diplomatik mənbəyə istinadən bildirib ki, Naqvi çərşənbə axşamı səhər İslamabaddan Tehrana yola düşüb.
Məlumata görə, səfər zamanı iki ölkə arasındakı münasibətlər və qarşılıqlı maraq doğuran məsələlər müzakirə olunacaq.
Pakistan daxili işlər nazirinin səfəri İranın daxili işlər naziri İsgəndər Mömini tərəfindən ötən ay İslamabada edilən səfərdən sonra baş tutub.
Pakistan və Qətər iyun ayında İranla ABŞ arasında son qarşıdurmaya son qoymaq məqsədilə anlaşma memorandumunun əldə olunmasında mühüm vasitəçilik rolu oynayıb.
İslamabadın Tehran və Vaşinqton arasında diplomatik əlaqələrin saxlanılması istiqamətində səyləri davam etdiyi bildirilir.
