BAKI,TurkicWorld,Yusif Şərifzadə
Qəzza zolağının cənubunda İsrailin pilotsuz uçuş aparatı ilə həyata keçirdiyi zərbə nəticəsində azı üç fələstinlinin öldüyü, bir neçə nəfərin isə yaralandığı bildirilir.
TurkicWorld xəbər verir ki, yerli mənbələrin Nasser Tibb Kompleksindəki tibb rəsmilərinə istinadən yaydığı məlumata görə, İsrail dronunun hücumu nəticəsində üç nəfər həyatını itirib, bir neçə nəfər müxtəlif dərəcəli xəsarət alıb.
Məlumata əsasən, son hücum Qəzza zolağının cənubundakı Xan Yunis şəhəri yaxınlığında, əl-Məvasi bölgəsində bir avtomobilin hədəfə alınmasından sonra baş verib.
Hadisənin təfərrüatları və hücumun hədəfi ilə bağlı əlavə məlumat verilməyib. İsrail ordusu son zərbə barədə hələlik rəsmi açıqlama yaymayıb.
Qəzzada ötən ilin oktyabrında əldə olunan atəşkəs razılaşmasına baxmayaraq, bölgədə vaxtaşırı hərbi əməliyyatlar və hücumlarla bağlı məlumatlar yayılır. Fələstin tərəfi yaşayış binaları, məcburi köçkünlərin sığındığı çadırlar və digər mülki obyektlərin də zərbələrə məruz qaldığını bildirir.
