BAKI,TurkicWorld,Yusif Şərifzadə
Livanın cənubunda İsrailə məxsus pilotsuz uçuş aparatının həyata keçirdiyi hücum nəticəsində iki hərbçi ağır yaralanıb.
TurkicWorld xəbər verir ki, Livan Silahlı Qüvvələri İsrailə məxsus pilotsuz uçuş aparatının ölkənin cənubunda hərbi avtomobilə zərbə endirdiyini açıqlayıb.
Ordunun yaydığı məlumata görə, hadisə Nəbatiyə şəhərində ictimai yol üzərində baş verib.
Bəyanatda bildirilib ki, İsrail pilotsuz uçuş aparatının hərbi avtomobili hədəfə alması nəticəsində iki hərbçi ciddi xəsarətlər alıb.
Yaralılar dərhal yaxınlıqdakı tibb müəssisəsinə çatdırılıb və onların müalicəsinin davam etdirildiyi qeyd olunub.
Hadisə İsrail və Livan arasında gərginliyin yenidən artdığı bir dövrə təsadüf edir. Son günlər xüsusilə Nəbatiyə və Tir bölgələrində hava hücumlarının intensivləşdiyi bildirilir.
Livan tərəfi İsrailin son əməliyyatlarının təkcə silahlı qruplara deyil, dövlət qurumlarına və təhlükəsizlik strukturlarına da təsir göstərdiyini vurğulayır. Rəsmi Beyrut bölgədə təhlükəsizlik vəziyyətinin daha da pisləşməsindən narahatlığını ifadə edir.
