BAKI,TurkicWorld,Yusif Şərifzadə
ABŞ-ın Demokrat senatoru Kris Merfi Donald Tramp administrasiyasını İranla bağlı siyasətdə “panika” və “ardıcıl səhvlər” etməkdə günahlandırıb.
TurkicWorld xəbər verir ki, ABŞ-ın Konnektikut ştatından Demokrat senator Kris Merfi Donald Trampın Omanı hədəf alacağına dair açıqlamalarını sərt tənqid edib.
Senator X sosial şəbəkəsində paylaşdığı açıqlamada bu cür bəyanatların regiondakı münaqişənin nəzarətdən çıxdığını göstərdiyini bildirib.
Merfi qeyd edib ki, “bu müharibənin niyə bu qədər yanlış istiqamətə getdiyini göstərən məqam məhz budur”. O əlavə edib: “Onlar davamlı panika içindədirlər və ardıcıl olaraq səhv üzərinə səhv edirlər”.
Son günlər Tramp administrasiyası İranla bağlı siyasətinə görə həm Demokratlar, həm də bəzi Respublikaçılar tərəfindən tənqid olunur. ABŞ daxilində bir sıra siyasətçilər Vaşinqtonun Yaxın Şərqdəki addımlarının regionu daha genişmiqyaslı qarşıdurmaya sürükləyə biləcəyindən narahat olduqlarını bildirirlər.
Analitiklər hesab edirlər ki, ABŞ daxilində İran siyasəti ilə bağlı siyasi fikir ayrılığı daha da dərinləşir. Xüsusilə hərbi ritorikanın sərtləşməsi və diplomatik prosesin zəifləməsi Vaşinqton administrasiyasına qarşı daxili təzyiqləri artırır.
Ekspertlərin fikrincə, ABŞ və İran arasında gərginliyin davam etməsi təkcə regional təhlükəsizlik üçün deyil, həm də qlobal enerji bazarları və beynəlxalq diplomatik münasibətlər üçün ciddi risklər yaradır.
