BAKI,TurkicWorld,Yusif Şərifzadə
Rusiya ABŞ və İran arasında artan gərginlik fonunda tərəfləri dialoqu davam etdirməyə və yeni hərbi qarşıdurmadan yayınmağa çağırıb.
TurkicWorld xəbər verir ki, Rusiya Xarici İşlər Nazirliyinin sözçüsü Mariya Zaxarova Moskvanın Vaşinqton və Tehran arasında diplomatik təmasların davam etdirilməsinin tərəfdarı olduğunu bildirib.
Zaxarovanın sözlərinə görə, Rusiya İranın zənginləşdirilmiş uran ehtiyatının çıxarılması prosesində yardım göstərməyə hazırdır, lakin Moskva bu təşəbbüsü tərəflərə “məcbur etmir”.
Rusiya rəsmisi vurğulayıb ki, hazırkı vəziyyətdə əsas məqsəd gərginliyin hərbi eskalasiyaya çevrilməsinin qarşısını almaqdır.
Eyni zamanda ABŞ Prezidenti Donald Tramp bəyan edib ki, Vaşinqton İranın yüksək səviyyədə zənginləşdirilmiş uran ehtiyatını saxlamasına icazə verməyəcək.
Məlumata görə, təxminən 440 kiloqram həcmində 60 faiz zənginləşdirilmiş uranın taleyi hazırda ABŞ və İran arasında aparılan danışıqlarda əsas mübahisə mövzularından biri olaraq qalır.
Ekspertlər hesab edirlər ki, İranın nüvə proqramı ilə bağlı fikir ayrılıqları Vaşinqton və Tehran arasında münasibətlərin normallaşmasını çətinləşdirən əsas məsələlərdən biridir.
Son aylarda regionda hərbi və siyasi gərginliyin artması fonunda beynəlxalq ictimaiyyət tərəfləri diplomatik həll yoluna üstünlük verməyə çağırır.
