Bakı. TurkicWorld:
İran Prezidenti Məsud Pezeşkian beynəlxalq münasibətlərdə qarşılıqlı hörmət və ortaq maraqlar prinsipinin vacibliyini vurğulayaraq, Tehran administrasiyasının dünya ölkələri ilə dost münasibətlərini inkişaf etdirməyə davam edəcəyini bəyan edib.
TurkicWorld xəbər verir ki, Pezeşkian istənilən formada müstəmləkəçilik siyasətini rədd etdiklərini bildirib. Onun sözlərinə görə, “kolonializm və istismar siyasətinin gələcək dünyada yeri olmayacaq”.
İran prezidenti əlavə edib ki, tolerantlıq İran xalqının mədəniyyətində dərin kök salıb və zülmə qarşı mübarizə ölkənin tarixi yaddaşında mühüm yer tutur.
Pezeşkianın açıqlaması Tehranın ABŞ tərəfindən irəli sürülən son sülh təşəbbüsünü müzakirə etdiyi və Hörmüz boğazı ətrafında baş verən dəniz qarşıdurmalarının bölgədə gərginliyi artırdığı bir dövrə təsadüf edir. Analitiklər hesab edir ki, İran rəhbərliyinin son bəyanatları regional proseslər və beynəlxalq diplomatik müzakirələr fonunda Tehranın siyasi mövqeyini nümayiş etdirməyə yönəlib.
