Bakı, TurkicWorld
İqlim dəyişikliyinin təsiri ilə Sakit okeanın cənub-qərbində dəniz səthinin temperaturu 1980-ci ildən bəri qlobal orta göstəricidən 3 dəfə daha sürətlə artıb.
TurkicWorld xəbər verir ki, bu barədə Ümumdünya Meteorologiya Təşkilatı (WMO) hesabat dərc edib.
Hesabatda Sakit okeanın cənub-qərbində dəniz səviyyəsinin qlobal orta göstəricidən daha yüksək olduğu və dəniz səthinin temperaturunun 1980-ci ildən bəri 3 dəfə daha sürətlə artdığı bildirilib.
Həmçinin, Sakit Okean adaları dəniz səviyyəsinin sürətlə yüksəlməsi, okeanların istiləşməsi və turşulaşmasından mənfi şəkildə təsirlənib və bölgə iqlim dəyişikliyi səbəbindən artan təhdidlərlə üzləşib.
Ümumdünya Meteorologiya Təşkilatının Baş katibi Celeste Saulo "İqlim dəyişikliyi qlobal böhrana çevrilib və bu, hazırda bəşəriyyətin üzləşdiyi ən böyük çağırışdır. Sakit okeanın cənub-qərbi regionunda icmalar, iqtisadiyyatlar və ekosistemlər bu təsirlərdən əhəmiyyətli dərəcədə zərər çəkir" deyə bildirib.
Saulo, okeanın istixana qazlarının səbəb olduğu həddindən artıq istiliyin yüzdə 90-dan çoxunu udduğunu və önümüzdəki əsrlərdə geri dönməz dəyişikliklərə məruz qalacağını qeyd edib. O, həmçinin, “İnsan fəaliyyətləri okeanın bizə kömək etmək və qorumaq qabiliyyətini zəiflədir. Dəniz səviyyəsi yüksəlməsi ilə bu vəziyyət getdikcə böyüyən bir təhlükəyə çevrilir” deyə xəbərdarlıq edib.
