BAKI,TurkicWorld
Özbəkistan və Cənubi Koreyanın İxrac-İdxal Bankı (KEXIM) süni intellekt üçün məlumat emalı mərkəzinin yaradılması layihəsinin hazırlanmasını davam etdirir.
Bu barədə Özbəkistanın Rəqəmsal Texnologiyalar Nazirliyi məlumat yayıb.
Nazirliyin məlumatına görə, görüş zamanı layihənin hazırlıq mərhələsində görülən işlər, mövcud vəziyyət və növbəti mərhələyə keçid üçün zəruri tədbirlər müzakirə olunub.
Tərəflər layihənin vaxtında və səmərəli həyata keçirilməsi, həllini gözləyən məsələlərin koordinasiyası və praktiki addımların müəyyənləşdirilməsi ilə bağlı fikir mübadiləsi aparıblar.
Tərəflər Özbəkistan və KEXIM arasında koordinasiyanın davam etdirilməsinin və layihənin reallaşdırılmasına mane olan məsələlərin həllinin vacibliyini vurğulayıblar.
Görüşdə həmçinin Özbəkistan və Cənubi Koreya arasında süni intellekt və rəqəmsal texnologiyalar sahəsində əməkdaşlığın genişləndirilməsi, eləcə də yeni birgə layihələrin həyata keçirilməsi perspektivləri müzakirə olunub.
KEXIM nümayəndələri Özbəkistanla əməkdaşlığın daha da inkişaf etdirilməsinə hazır olduqlarını bildiriblər.
Layihə Özbəkistanın rəqəmsal infrastrukturunu genişləndirmək və süni intellektlə yanaşı, digər qabaqcıl texnologiyaların tətbiqini dəstəkləmək üçün hesablama imkanlarını artırmaq səyləri çərçivəsində həyata keçirilir.
