Bakı. TurkicWorld:
Qazaxıstan nümayəndə heyəti nüvə enerjisindən dinc məqsədlərlə istifadə sahəsində ölkələr arasında əməkdaşlığı genişləndirmək məqsədilə Yaponiyaya səfər edib.
TurkicWorld xəbər verir ki, bu barədə Qazaxıstanın Energetika Nazirliyi məlumat yayıb.
Qazaxıstanın Energetika Nazirliyi, Xarici İşlər Nazirliyi, Qazaxıstan Milli Nüvə Mərkəzi, Nüvə Fizikası İnstitutu, Qazaxıstan Atom Elektrik Stansiyaları MMC, “Mangystau Atom Elektrik Stansiyası” MMC-nin nümayəndələri səfər çərçivəsində Yaponiyanın Xarici İşlər Nazirinin müavini, eləcə də İqtisadiyyat, Ticarət və Sənaye Nazirliyinin, Yaponiya Atom Enerjisi Agentliyinin və Nüvə Tənzimləmə Qurumunun (NRA) nümayəndələri ilə görüşüb.
Görüşlər zamanı nüvə enerjisindən dinc məqsədlərlə istifadə sahəsində gələcək ikitərəfli əməkdaşlıq, o cümlədən təcrübə mübadiləsi və kadr hazırlığı məsələləri müzakirə olunub.
Qeyd edək ki, Qazaxıstan təsdiqlənmiş təbii uran ehtiyatlarına görə dünyada ikinci yerdədir. Qazaxıstan Respublikasının dərinliklərində bütün sübut edilmiş dünya ehtiyatlarının təxminən 14 faizi var. Ölkədə uranın bütün təsdiqlənmiş ehtiyatlarının 700 min tondan çox olacağı gözlənilir.
Qazaxıstan 2009-cu ildə uran istehsalında ABŞ-ı ötüb və qlobal bazarda hökmranlıq etməkdə davam edir.
Qlobal uran istehsalının təxminən 40 faizi Qazaxıstanın payına düşür. Ölkədə 2021-ci ildə uran istehsalının həcmi 21,8 min tona, 2022-ci ildə isə 21,3 min tona çatıb.
