BAKI,TurkicWorld
İranın xarici işlər naziri Abbas Arakçi və Rusiyanın xarici işlər naziri Sergey Lavrov Hörmüz boğazında gəmiçilik marşrutları ilə bağlı son vəziyyəti və regional inkişafları müzakirə ediblər.
TurkicWorld xəbər verir ki, görüş BMT Baş Assambleyasının 81-ci sessiyası çərçivəsində Nyu-Yorkda keçirilib.
İranın ISNA agentliyinin məlumatına görə, tərəflər ABŞ-ın öhdəliklərlə bağlı mövqeyi və regiondakı son hadisələr fonunda Qərbi Asiyadakı vəziyyət barədə fikir mübadiləsi aparıblar.
Abbas Arakçi görüş zamanı İran və Oman arasında Hörmüz boğazında gəmiçilik yollarının idarə olunması ilə bağlı razılaşmanın son vəziyyəti və davam edən vasitəçilik səyləri barədə Lavrova məlumat verib.
İran xarici işlər naziri bildirib ki, Tehran Hörmüz boğazında yaranmış təhlükəsizlik vəziyyətində ABŞ-ın siyasətini məsul tərəf hesab edir və ölkəsinin milli maraqlarını qorumaqda qərarlı olduğunu vurğulayıb.
Arakçi qeyd edib ki, İran Hörmüz boğazından öz milli təhlükəsizliyinə qarşı təzyiq vasitəsi kimi istifadə edilməsinə imkan verməmək niyyətindədir.
Sergey Lavrov isə Rusiya tərəfinin fevral ayında başlayan müharibə zamanı ABŞ və İsrailin İrana qarşı zərbələrini pislədiyini xatırladıb.
Rusiya xarici işlər naziri bütün ölkələrin beynəlxalq hüquqa və BMT Nizamnaməsinin prinsiplərinə əməl etməsinin vacibliyini vurğulayıb.
