BAKI,TurkicWorld,Yusif Şərifzadə
Kanada hökumətində ABŞ ilə aparılan ticarət danışıqlarından məlumatlı mənbə bildirib ki, tərəflər arasında müzakirələr müsbət istiqamətdə davam edir. Mənbənin sözlərinə görə, Vaşinqton da avqustun 19-da yeni gömrük rüsumları qüvvəyə minməzdən əvvəl Kanada ilə razılığa gəlmək istəyir.
TurkicWorld xəbər verir ki, ABŞ Prezidenti Donald Tramp avqustun 19-dan Kanadadan idxal olunan bir sıra məhsullara 50 faizlik yeni gömrük rüsumlarının tətbiq ediləcəyini açıqlayıb. Yeni rüsumların ABŞ, Meksika və Kanada arasında azad ticarət sazişi çərçivəsində güzəştlərdən yararlanan bəzi Kanada məhsullarına da şamil olunması nəzərdə tutulur.
Adının açıqlanmasını istəməyən Kanada hökuməti rəsmisi danışıqların hazırda yaxşı getdiyini bildirib. Onun sözlərinə görə, ABŞ tərəfinin mövqeyində də müsbət məqamlar müşahidə olunur və Vaşinqton avqustun 19-dək razılaşmanın əldə olunmasında maraqlıdır.
Kanadanın ABŞ ilə ticarət əlaqələrinə məsul naziri Dominik LöBlan ABŞ-nin ticarət nümayəndəsi Ceymison Qrir ilə bu həftə ikinci dəfə görüşəcək. Kanadanın baş ticarət danışıqçısı Cenis Şaret də görüşdə iştirak edəcək. Bu, LöBlan ilə Qrir arasında son üç həftədə keçirilən dördüncü görüş olacaq.
Kanada tərəfi yeni gömrük rüsumları qüvvəyə minməzdən əvvəl razılaşmanın əldə olunmasına çalışır. Mənbə iki ölkənin nümayəndələrinin ortaq həll yolu tapmaq üçün sıx əməkdaşlıq etdiyini bildirib. Bununla yanaşı, danışıqların nəticəsiz qalacağı təqdirdə Kanada ilə ABŞ arasındakı münasibətlərin də gərginləşə biləcəyi vurğulanır.
Kanadanın baş ticarət danışıqçısı Cenis Şaret xarici işlər, maliyyə və kənd təsərrüfatı sahələrini təmsil edən yüksək vəzifəli rəsmilərdən ibarət heyətlə ABŞ tərəfi ilə müntəzəm danışıqlar aparır. Məqsəd yeni gömrük rüsumlarının qarşısını ala biləcək razılaşmanın şərtlərini müəyyənləşdirməkdir.
Kanadanın taxıl istehsalında mühüm yer tutan Saskaçevan əyalətinin baş naziri Skott Mo son danışıqları ümidverici qiymətləndirib. Bununla belə, o, əsas diqqətin ABŞ, Meksika və Kanada arasında mövcud ticarət sazişinin yenilənməsinə yönəldilməli olduğunu bildirib.
ABŞ Ticarət Nümayəndəliyinin məlumatına görə, nəzərdə tutulan yeni rüsumlar Kanadadan idxal edilən təxminən 20 milyard dollarlıq məhsulu əhatə edə bilər. Bu məbləğ ABŞ-nin 2025-ci ildə Kanadadan idxal etdiyi 383 milyard dollarlıq məhsulun təxminən 5,2 faizinə bərabərdir.
