BAKI,TurkicWorld,Yusif Şərifzadə
Yəməndə fəaliyyət göstərən “Ənsar Allah” hərəkatının (husilər) hərbi sözçüsü Yəhya Səri Səna hava limanının blokadasının qəbuledilməz olduğunu bildirib və bütün ehtimallara hazır olduqlarını açıqlayıb.
TurkicWorld xəbər verir ki, Yəhya Səri Səna hava limanının davam edən mühasirəsini “qəbul edilə bilməz və dözülməz” adlandırıb. O, blokadaya qarşı blokada siyasəti yürüdəcəklərini və hər hansı gərginliyə eyni şəkildə cavab verəcəklərini bildirib.
Husi sözçüsü Səudiyyə Ərəbistanını ötən həftə Səna hava limanına zərbələr endirməkdə ittiham edib. Onların iddiasına görə, bu hücumlara cavab olaraq Səudiyyə Ərəbistanındakı Əbha Beynəlxalq Hava Limanı hədəfə alınıb.
Yəhya Səri bildirib ki, Yəmən silahlı qüvvələri “bütün variantlara tam hazırdır” və Səudiyyə Ərəbistanının hər hansı addımına cavab vermək imkanına malikdir.
O, Yəmən xalqını ümumi səfərbərliyə davam etməyə, bütün ssenarilərə və mümkün inkişaflara hazır olmağa, həmçinin cəbhələrə dəstək verməyə çağırıb.
Husilərin açıqlaması Səudiyyə Ərəbistanı ilə Yəməndəki silahlı qruplaşma arasında gərginliyin yenidən artdığı bir vaxtda səslənib. Səudiyyə tərəfi isə bu ittihamlarla bağlı hələlik yeni açıqlama verməyib.
