BAKI,TurkicWorld Orxan Qədirzadə
İran İslam İnqilabı Keşikçiləri Korpusu bölgədə yerləşən ABŞ hərbi bazalarına raket zərbələri endirdiyini bəyan edib. Məlumata görə, bu addım Sirik və Keşm adalarına edilən hücumlara cavab olaraq həyata keçirilib.
İran dövlət televiziyasının yaydığı açıqlamada bildirilir ki, ABŞ hərbi qüvvələrinin Sirik və Keşm adalarına qarşı həyata keçirdiyi hücumlardan sonra bölgədəki hədəflər raketlərlə vurulub.
İslam İnqilabı Keşikçiləri Korpusunun yaydığı məlumatda qeyd olunur ki, ABŞ qüvvələrinin adalara hücumundan sonra korpusun Hərbi Hava və Aerokosmik Qüvvələri tərəfindən bölgədəki düşmən mövqelərinə raket zərbələri endirilib.
Qarşılıqlı zərbələrin təfərrüatlarına dair yayılan digər məlumatda bildirilir ki, yerli vaxtla saat 01:30 radələrində dörd neft tankeri Hörmüz boğazından icazəsiz keçməyə cəhd göstərib. Məlumata əsasən, həmin tankerlərdən biri hücuma məruz qalıb.
Açıqlamada daha sonra qeyd edilir ki, yerli vaxtla təxminən saat 02:00-da ABŞ qüvvələri Sirik və Keşm adalarında yerləşən iki rabitə qülləsinə raket zərbələri endirib.
İslam İnqilabı Keşikçiləri Korpusu bəyan edib ki, bu hücumlara cavab olaraq ABŞ-ın Küveytdə yerləşən Əli Əl-Səlim hərbi hava bazası və Bəhreyndə yerləşən ABŞ Beşinci Donanmasının qərargahı hədəfə alınıb.
Son hadisələr Yaxın Şərqdə gərginliyin daha da artdığı bir dövrdə baş verir və regionda təhlükəsizlik vəziyyəti ilə bağlı narahatlıqları gücləndirir.
