BAKI,TurkicWorld,Yusif Şərifzadə
ABŞ Dövlət katibi Marko Rubio Hörmüz boğazında mümkün təhlükəsizlik riskləri ilə bağlı alternativ fəaliyyət planının hazırlanmasının vacibliyini vurğulayıb. O bildirib ki, ABŞ və müttəfiqləri mümkün ssenarilərə hazır olmalıdırlar.
TurkicWorld xəbər verir ki, Marko Rubio İsveçin Helsingborq şəhərində keçirilən toplantı çərçivəsində jurnalistlərə açıqlamasında ABŞ və NATO müttəfiqləri ilə Hörmüz boğazının yenidən açılması ilə bağlı mümkün çətinlikləri müzakirə etdiyini bildirib.
Rubionun sözlərinə görə, tərəflər Hörmüz boğazında təhlükəsizlik vəziyyətinin pisləşməsi ehtimalını nəzərə alaraq alternativ mexanizmlər üzərində düşünməlidirlər. O bildirib ki, “orada atəş açılması halı üçün Plan B-yə ehtiyac var”.
ABŞ Dövlət katibi qeyd edib ki, Vaşinqtonun üstünlük verdiyi ssenari İranın boğazın fəaliyyətini təmin etməsi və vəziyyətin gərginləşməməsidir. Bununla yanaşı, o vurğulayıb ki, əgər Tehran bu istiqamətdə fərqli qərar qəbul edərsə, ABŞ və digər ölkələr əlavə addımlar atmalı ola bilərlər. Bununla belə, Rubio NATO-nun mümkün prosesdə konkret roluna dair dəqiq mövqe açıqlamayıb.
Rubio həmçinin davam edən danışıqlara toxunaraq bildirib ki, tərəflər hələ də mürəkkəb və çətin mövqelərdə qalırlar. Onun sözlərinə görə, müəyyən irəliləyiş olsa da, yekun nəticəyə çatmaq üçün hələ kifayət qədər məsafə mövcuddur.
