BAKI,TurkicWorld, Orxan Qədirzadə
ABŞ rəsmiləri Qəzza ilə bağlı planın həyata keçirilməsi üçün əsas şərtin HƏMAS-ın silahsızlaşdırılması olduğunu bəyan edib.
TurkicWorld xəbər verir ki, Marko Rubio bildirib ki, son günlər HƏMAS-ın silahsızlanması istiqamətində “ümidverici işarələr” müşahidə olunur və tərəflər razılaşmaya yaxınlaşa bilər.
Rubio vurğulayıb ki, Qəzza ilə bağlı beynəlxalq plan yalnız HƏMAS silahı tərksilah edəcəyi təqdirdə reallaşa bilər. Onun sözlərinə görə, bu baş verməyənədək regiondakı vəziyyət qeyri-müəyyən olaraq qalacaq.
ABŞ dövlət katibi qeyd edib ki, məqsəd beynəlxalq təhlükəsizlik qüvvələrinin dəstəyi ilə fələstinli təhlükəsizlik strukturlarının Qəzzada nəzarəti təmin etməsidir.
Digər tərəfdən, HƏMAS nümayəndələri bu mövqeyə etiraz edərək silahsızlanma tələbinin mövcud atəşkəs razılaşmasının şərtləri ilə ziddiyyət təşkil etdiyini bildiriblər. HƏMAS sözçüsü bu məsələni gündəmə gətirməyin danışıqlar prosesinə mənfi təsir göstərdiyini qeyd edib.
Məlumata görə, tərəflər arasında atəşkəs danışıqları davam etsə də, qarşılıqlı ittihamlar və şərtlər üzrə fikir ayrılığı prosesi çətinləşdirir.
Ekspertlər hesab edir ki, HƏMAS-ın silahsızlaşdırılması məsələsi regionda uzunmüddətli sabitliyin əsas mübahisə mövzularından biri olaraq qalır.
