Bakı, TurkicWorld
ABŞ-ın yeni seçilmiş prezidenti Donald Tramp Los-Ancelesin dəbdəbəli məhəllələrindən birində baş verən dağıdıcı meşə yanğınları ilə bağlı Co Bayden administrasiyasını və Kaliforniya qubernatoru Qavin Newsomu sərt tənqid edib.
TurkicWorld xəbər verir ki, Tramp Truth Social platformasında paylaşdığı mesajda yanğınların Bayden və Newsomun səriştəsiz idarəçiliyinin və yanlış siyasətlərin nəticəsi olduğunu iddia edib.
"Bu, Co Baydenin mənə qoyub getdiyi ölkədir. Təşəkkür edirəm, Co! Ətraf mühit siyasətiniz su mənbələrini bataqlıqlara və təbiət qoruqlarına yönəldib, yanğınla mübarizə üçün lazımlı mənbələri isə qurudub. Newsom dərhal istefa verməlidir." - deyə sərt tənqid ünvanlayıb.
Kaliforniya qubernatoru Qavin Newsom is Trampın ittihamlarına cavab verərək onun faciəvi vəziyyətdə belə siyasi nüfus qazanmağa çalışmasını qınayıb. "İnsanlar evlərini, yaxınlarını, hətta həyatlarını itirir. Məktəblər, ailələr məhv olur, lakin Tramp yenə də siyasətlə məşğuldur. Bu, tamamilə məsuliyyətsizlikdir." - deyə vurğulayıb.
Newsom həmçinin qeyd edib ki, Kaliforniyada baş verən meşə yanğınlarının qarşısının alınması üçün dövlət tərəfindən bütün lazımi tədbirlər görülür.
Trampın Bayden administrasiyasını sərt tənqid etməsinə rəğmən, Ağ Evdən hələlik heç bir rəsmi açıqlama verilməyib. ABŞ mətbuatı isə Trampın Los-Anceles yanğınlarını Newsomla davam edən köhnə mübahisəsini yenidən alovlandırmaq üçün istifadə etdiyini yazır.
Belə ki, keçmişdə də Tramp Kaliforniya meşə yanğınlarının qarşısının alınmamasını dövlətin pis idarəçiliyi ilə əlaqələndirmiş, Newsom isə bu iddiaları rədd etmişdi.
Qeyd edək ki, Los-Anceles rəsmiləri yanvarın 7-də şəhərin dəbdəbəli məhəllələrindən birində baş verən yanğınların 6 ayrı sahədə davam etdiyini və hazırda yanğında 5 nəfərin həlak olduğunu açıqlayıb. Yanğınların səbəbləri hazırda araşdırılır, lakin rəsmi mənbələr havanın quraq və küləkli şəraitinin alovun sürətlə yayılmasına səbəb olduğunu qeyd edirlər.
