BAKI, TurkicWorld, Orxan Qədirzadə
İsveçrə Silahlı Qüvvələrinin Baş Qərargah rəisi Tomas Züssli ölkənin mövcud hərbi imkanlarının tammiqyaslı hücumun qarşısını almaq üçün kifayət etmədiyini bəyan edib və müdafiə xərclərinin artırılmasına çağırış edib.
TurkicWorld xəbər verir ki,Züssli bu barədə Neue Zürcher Zeitung qəzetinə müsahibəsində danışıb. O bildirib ki, İsveçrə qeyri-dövlət aktorları tərəfindən kritik infrastruktura yönələ biləcək hücumlara və kiber təhlükələrə qarşı müəyyən hazırlıq səviyyəsinə malikdir, lakin orduda ciddi texniki və təchizat boşluqları qalmaqdadır.
İlin sonunda vəzifəsini tərk edəcək Baş Qərargah rəisinin sözlərinə görə, mövcud şəraitdə İsveçrə nə uzaq məsafədən yönələ biləcək təhdidlərə, nə də tammiqyaslı hərbi hücuma qarşı özünü müdafiə edə biləcək vəziyyətdədir.
O, Ukrayna ərazisində müharibənin başladığı 24 fevral 2022-ci ili xatırladaraq qeyd edib ki, cəmiyyət və siyasi dairələr ordunun real imkanları barədə yanlış təsəvvürə qapılmamalıdır. Züssli vurğulayıb ki, real fövqəladə vəziyyət zamanı hərbçilərin yalnız üçdə birinin tam təchizatlı olacağı faktı ciddi narahatlıq doğurur.
Baş Qərargah rəisi Ukraynadakı müharibənin İsveçrədə genişmiqyaslı şok effekti yaratmamasını ölkənin son müharibəni 180 il əvvəl yaşamış olması, coğrafi mövqeyi və uzunmüddətli neytrallıq siyasəti ilə əlaqələndirib. Bununla belə, onun fikrincə, İsveçrənin münaqişədən uzaq olduğu qənaəti düzgün deyil. Züssli bildirib ki, Ukrayna ilə İsveçrə arasında yalnız iki ölkə – Macarıstan və Avstriya yerləşir.
O, neytrallığın avtomatik təhlükəsizlik təminatı yaratdığı düşüncəsinə də etiraz edərək qeyd edib ki, silahlı müdafiə imkanları olmayan bir sıra neytral ölkələr tarixdə müharibələrə cəlb olunub. Onun sözlərinə görə, neytrallıq yalnız silahlı şəkildə müdafiə olunduğu halda real dəyər daşıyır.
Züssli əlavə edib ki, İsveçrənin müdafiə xərclərinin mərhələli şəkildə artırılması planları mövcud təhlükəsizlik mühitində kifayət hesab edilə bilməz. O, hazırkı planlara əsasən ordunun tam hazırlıq səviyyəsinə təxminən 2050-ci illərdə çata biləcəyini bildirib və bunu uzun müddət kimi qiymətləndirib.
Hazırda İsveçrə ümumi daxili məhsulunun təxminən 0,7 faizi həcmində müdafiə xərci ayırır və 2032-ci ilədək bu göstəricini 1 faizə çatdırmağı öhdəsinə götürüb. Bu çərçivədə ölkə artilleriya və digər quru döyüş sistemlərini modernləşdirir, həmçinin köhnəlmiş döyüş təyyarələrinin əvəzlənməsi üçün F-35A tipli qırıcılar alır. Bununla yanaşı, layihələrdə xərclərin artması və dövlət büdcəsinin məhdud imkanları fonunda müdafiə xərclərinin məqsədəuyğunluğu ilə bağlı müzakirələr də davam edir.
