Bakı. TurkicWorld:
20 fevral 2026-cı il tarixində Türk Mədəniyyəti və İrsi Fondunun prezidenti, professor Aktotı Raimkulova Bakı Dövlət Universitetində olub və universitetin rektoru, professor Elçin Babayev ilə görüş keçirib.
TurkicWorld xəbər verir ki, görüş zamanı Türk Mədəniyyəti və İrsi Fondu ilə Bakı Dövlət Universiteti arasında əməkdaşlığın mövcud vəziyyəti və inkişaf perspektivləri ətrafında fikir mübadiləsi aparılıb.
Tərəflər zəngin və qədim türk mədəni irsinin qorunması və gələcək nəsillərə ötürülməsi istiqamətində elmi və təhsil müəssisələri arasında əməkdaşlığın gücləndirilməsinin əhəmiyyətini vurğulayıblar. Eyni zamanda, universitetlərdə türk mədəni irsinin öyrənilməsi, elmi tədqiqatların təşviqi və bu sahəyə marağın artırılması məsələləri xüsusi diqqət mərkəzində olub.
Görüş çərçivəsində qarşılıqlı maraq doğuran istiqamətlər üzrə birgə layihələrin həyata keçirilməsi, akademik əməkdaşlığın genişləndirilməsi və ortaq təşəbbüslərin təşviqi ilə bağlı niyyət ifadə olunub.
Səfər çərçivəsində professor Aktotı Raimkulova Bakı Dövlət Universitetinin Heydər Əliyev Muzeyi və Lektoriyası, Faydalı Qazıntılar Muzeyi, həmçinin universitetin müasir Elmi Kitabxanası ilə tanış olub. Universitetin fəaliyyəti, elmi-tədqiqat istiqamətləri və mövcud elmi potensialı barədə ətraflı məlumat təqdim edilib.
Görüş qarşılıqlı anlaşma və konstruktiv dialoq şəraitində keçib.
