BAKI,TurkicWorld
Omanın xarici işlər naziri Bədr bin Həməd əl-Busaidi ilə Almaniyanın xarici işlər naziri Yohann Vadeful Hörmüz boğazında və Qırmızı dənizdə sərbəst gəmiçiliyin bərpası yollarını müzakirə ediblər. Danışıqlar sentyabrın 19-da telefon vasitəsilə aparılıb.
TurkicWorld xəbər verir ki, Oman Xarici İşlər Nazirliyinin məlumatına əsasən, nazirlər regionda qarşılıqlı maraq doğuran məsələlər ətrafında fikir mübadiləsi aparıblar. Tərəflər Hörmüz boğazında və Qırmızı dənizdə sərbəst gəmiçiliyin bərpasına yönəlmiş mümkün addımları nəzərdən keçiriblər.
Danışıqlarda regional gərginliyin və qarşıdurmanın azaldılmasına yönəlmiş səylərin dəstəklənməsi də əsas mövzulardan biri olub. Oman və Almaniya bu istiqamətdə atılacaq addımların regionda təhlükəsizlik və sabitliyin möhkəmləndirilməsinə xidmət etməsinin vacibliyini vurğulayıblar.
Oman son aylarda Hörmüz boğazında kommersiya gəmiçiliyinin bərpası istiqamətində diplomatik səylər göstərir. Məsqət iyulda boğazda sərbəst gəmiçiliyin beynəlxalq hüquqa uyğun şəkildə bərpası üçün bütün tərəflərlə əməkdaşlığı davam etdirdiyini açıqlamışdı.
Bundan əvvəl Oman Beynəlxalq Dəniz Təşkilatı ilə əlaqələndirmə şəraitində gəmilər üçün Hörmüz boğazından müvəqqəti keçid dəhlizi yaradılması üzərində də çalışıb. Oman tərəfi bu mexanizmin boğazdan tranzit keçidin təmin edilməsinə və ticarət axınının davam etdirilməsinə xidmət etdiyini bildirib.
Oman həmçinin İranla aparılan danışıqlarda Hörmüz boğazında gəmiçiliyin bərpası üçün praktiki razılaşmaların əldə edilməsinin vacibliyini vurğulayıb. Avqust ayında Bədr əl-Busaidi və İranın xarici işlər naziri Abbas Əraqçi bu məsələni müzakirə edərək sərbəst gəmiçilik və ticarət axınının bərpasına xidmət edəcək praktiki anlaşmaların vacibliyini qeyd etmişdilər.
