BAKI,TurkicWorld Orxan Qədirzadə
ABŞ ordusu Texas ştatında AH-64 Apache döyüş helikopterinin qəzaya uğraması və iki hərbçinin həlak olmasından sonra bu tip helikopterlərin bütün təlim uçuşlarını müvəqqəti dayandırıb.
Ordu bildirib ki, uçuşlar qəzanın əsas səbəbləri müəyyənləşdirilənədək bərpa edilməyəcək. Qəzada 34 yaşlı Deontrey Hyui və 25 yaşlı Seth Olmsted həyatını itirib. Hadisənin təlim zamanı, yoxsa bir məntəqədən digərinə uçuş zamanı baş verdiyi hələ müəyyən edilməyib.
ABŞ ordusunun məlumatına görə, son qəzanın səbəbləri araşdırılır. Bununla yanaşı, “Defense One” platformasının təhlilinə əsasən, AH-64E Apache helikopterlərinin ötürmə sistemində son dövrlərdə potensial texniki problem aşkarlanıb. Daxili təhlükəsizlik sənədində nasazlığın arxa pərvanənin hərəkət gücünün, elektrik enerjisinin və hidravlik sistemin itirilməsinə səbəb ola biləcəyi qeyd olunur.
ABŞ ordusu istehsalçı şirkətlə birlikdə problemi araşdırdığını açıqlayıb. Eyni zamanda maliyyə çatışmazlığı səbəbindən Apache helikopterlərinin uçuş saatlarının azaldılması və köhnə AH-64D modellərinin istismardan çıxarılması planlaşdırılır.
Ordu daha əvvəl də aviasiya bölmələrinin uçuşlarını müvəqqəti dayandırıb. 2023-cü ildə Alyaska və Kentukkidə baş verən ayrı-ayrı qəzalarda 12 hərbçinin həlak olmasından sonra əlavə təlimlər keçirilənədək uçuşlara məhdudiyyət qoyulmuşdu.
Hazırda Apache helikopterlərinin döyüş missiyalarının tam dayandırılması barədə qərar verilməyib.
