BAKI,TurkicWorld,Yusif Şərifzadə
ABŞ Prezidenti Donald Tramp İranla müharibə fonunda hazırda daha ehtiyatlı yanaşma nümayiş etdirir və vəziyyətin inkişafını gözləməyi üstün tutur.
TurkicWorld xəbər verir ki, ABŞ administrasiyasının rəsmiləri Trampın yaxın zamanda hərbi eskalasiyaya getmək barədə əvvəlki sərt açıqlamalarını yumşaltdığını və daha səbirli mövqe tutduğunu bildiriblər.
Donald Tramp özü bu yanaşmanı "sakit strategiya" kimi xarakterizə edib. ABŞ Prezidenti İran iqtisadiyyatına göstərilən təzyiqin nəticələrini gözlədiyini bildirib.
Vaşinqtonun mövqeyinə görə, Hörmüz boğazının bağlanması və İran neftinin ixracına məhdudiyyətlərin tətbiqi ölkə iqtisadiyyatına ciddi təsir göstərir.
Bununla belə, bəzi müşahidəçilər ABŞ-nin uzunmüddətli hərbi eskalasiyanı davam etdirmək üçün sursat ehtiyatları ilə bağlı çətinliklərlə üzləşə biləcəyini bildirirlər.
Məlumatlara görə, Trampa ABŞ ordusunun davamlı və genişmiqyaslı hərbi əməliyyatları uzun müddət davam etdirmək imkanları ilə bağlı xəbərdarlıqlar verilib.
ABŞ administrasiyasının bəzi nümayəndələri isə hesab edirlər ki, zaman keçdikcə İranda iqtisadi çətinliklər artacaq və bu vəziyyət ölkə rəhbərliyi daxilində fikir ayrılıqlarına səbəb ola bilər.
Administrasiya rəsmilərindən biri iddia edib ki, ABŞ-nin İrana qarşı müharibə aparması İran cəmiyyətində iqtisadi problemlərdən daha çox milli birlik hissini gücləndirə bilər. Buna görə də Vaşinqton hazırda gözləmə mövqeyini daha məqsədəuyğun hesab edir.
