BAKI,TurkicWorld,Yusif Şərifzadə
ABŞ vitse-prezidenti Cey Di Vens İranın Hörmüz boğazından keçən gəmilərdən keçid haqqı almaq planının olmadığını Vaşinqtona bildirdiyini açıqlayıb.
TurkicWorld xəbər verir ki, Cey Di Vens "Foks Nyus"a müsahibəsində İran hakimiyyəti daxilində bəzi şəxslərin Hörmüz boğazından keçid üçün ödəniş tətbiq edilməsindən danışdıqlarını, lakin Tehranın ABŞ-yə belə bir planının olmadığını çatdırdığını bildirib.
ABŞ vitse-prezidenti qeyd edib ki, Vaşinqton Körfəz ölkələrinin neft və qaz ixracının müharibədən əvvəlki səviyyəyə qayıdacağını gözləyir.
Vensin sözlərinə görə, İran tərəfi də ABŞ-yə enerji ixracının əvvəlki səviyyəyə qaytarılması istiqamətində hərəkət edəcəyini bildirib.
O əlavə edib ki, Körfəz ölkələri də neft və qaz ixracının müharibədən əvvəlki göstəricilərə qayıtmasını istəyirlər.
Bununla belə, ABŞ vitse-prezidenti Vaşinqtonun İranın verdiyi açıqlamalara yalnız sözlər əsasında yanaşmayacağını vurğulayıb. Onun sözlərinə görə, ABŞ İranın bəyanatlarından daha çox atdığı addımları nəzərə alacaq və vəziyyəti yerində qiymətləndirəcək.
