BAKI,TurkicWorld,Yusif Şərifzadə
Yaponiyanın Vaseda Universitetinin professoru Abdullah Baabud bildirib ki, Oman həm regional sabitliyin qorunması, həm də beynəlxalq öhdəliklərinə görə İranın Hörmüz boğazına tam nəzarət etməsini dəstəkləmir.
TurkicWorld xəbər verir ki, Abdullah Baabud bu barədə Əl-Cəzirəyə müsahibəsində danışıb.
Professorun sözlərinə görə, Oman bir neçə dəfə hücumlara məruz qalmasına baxmayaraq, Tehranla dialoqu davam etdirməyə çalışır və Hörmüz boğazında təhlükəsiz gəmiçiliyin təmin olunması üçün xidmət haqqı mexanizmi kimi mümkün həll yollarını müzakirə etməyə hazırdır.
Baabud qeyd edib ki, Maskat bütün tərəflərlə işləmək bacarığı və təmkinli diplomatik yanaşması sayəsində regionda etibarlı vasitəçi kimi qəbul edilir. Onun sözlərinə görə, bu etimad hətta ABŞ-la danışıqlardan narazı qalan İran tərəfindən də qorunub saxlanılır.
Analitik bildirib ki, Oman və İran arasında Hörmüz boğazının gələcəkdə necə idarə olunacağı ilə bağlı danışıqlarda müəyyən irəliləyiş əlamətləri müşahidə olunur.
O əlavə edib ki, Tehran Omanla apardığı danışıqları ABŞ-la dayandırılmış danışıqlardan ayrı göstərməyə çalışsa da, əslində bu proseslər bir-biri ilə sıx bağlıdır. Professorun fikrincə, Hörmüz boğazı həm Vaşinqton, həm də Tehran üçün əsas müzakirə mövzularından biridir.
Qeyd edək ki, bu qiymətləndirmələr Abdullah Baabudun şəxsi təhlilləridir və rəsmi mövqe kimi təqdim edilmir.
