BAKI,TurkicWorld,Yusif Şərifzadə
Qətərdəki Corctaun Universitetinin professoru Mehran Kəmrəva hesab edir ki, həm ABŞ, həm də İran hərbi qarşıdurmanı dayandırmaq üçün çıxış yolu axtarır, lakin tərəflər hələlik geri addım atmağa hazır görünmür.
TurkicWorld xəbər verir ki, Kəmrəva bildirib ki, nə Vaşinqton, nə də Tehran geri çəkilərək zəif görünmək istəmir. Onun sözlərinə görə, bu səbəbdən münaqişənin qısa müddətdə başa çatması ehtimalı hələ də məhduddur.
Ekspert qeyd edib ki, İran ABŞ-nin hücumlarını davam etdirəcəyi təqdirdə müharibəni "növbəti mərhələyə" keçirəcəyi ilə hədələyib. Bu isə ABŞ-nin bölgədəki müttəfiqlərinin mülki obyektlərinin hədəfə alınmasını nəzərdə tuta bilər.
Kəmrəvanın fikrincə, Tehran üçün belə bir addım ciddi strateji risklər yarada bilər. O vurğulayıb ki, bu cür hücumlar İranın region ölkələri ilə münasibətlərinə uzunmüddətli zərər vura və gələcək əməkdaşlıq imkanlarını məhdudlaşdıra bilər.
Ekspert əlavə edib ki, İranın bölgədə hücum edə biləcəyi hədəflərin sayı getdikcə azalır. Onun sözlərinə görə, ABŞ hərbi qüvvələri əvvəlki dövrlərlə müqayisədə daha yaxşı qorunduğu üçün onlara qarşı hücumlar da çətinləşir.
Kəmrəva hesab edir ki, hazırkı vəziyyətdə İranın hərbi və siyasi manevr imkanları əvvəlki mərhələlərlə müqayisədə daha məhdud görünür.
