BAKI,TurkicWorld,Yusif Şərifzadə
Küveyt Yanğınsöndürmə Qüvvələri İranın hücumları nəticəsində baş vermiş yanğınların nəzarət altına alındığını, hadisələr zamanı bir neçə yanğınsöndürənin və bir neft sektorunda çalışan əməkdaşın xəsarət aldığını açıqlayıb.
TurkicWorld xəbər verir ki, Küveyt Yanğınsöndürmə Qüvvələrinin sözçüsü Məhəmməd Bədir İbrahim bildirib ki, günorta saatlarında İranın hücumları nəticəsində iki ayrı ərazidə baş vermiş yanğınlar tam söndürülüb. Onun sözlərinə görə, yanğın baş verən ərazilərdən biri söndürmə işləri davam edərkən yenidən hədəfə alınıb.
Rəsmi açıqlamaya əsasən, həmin ərazidə bir neçə yanğınsöndürən və neft müəssisəsinin bir əməkdaşı müxtəlif dərəcəli xəsarətlər alıb. Yaralıların vəziyyəti ilə bağlı əlavə məlumat verilməyib.
Məhəmməd Bədir İbrahim əlavə edib ki, yaşayış məntəqələrinə düşən qəlpələrin yaratdığı daha üç yanğın da operativ şəkildə söndürülüb. Bu hadisələr nəticəsində isə xəsarət alan olmayıb.
Hadisələrin miqyası və hücumların vurduğu maddi ziyan barədə hələlik rəsmi məlumat açıqlanmayıb. Məlumat Küveyt Yanğınsöndürmə Qüvvələrinin rəsmi açıqlamasına əsaslanır və müstəqil mənbələr tərəfindən tam təsdiqlənməyib.
