BAKI,TurkicWorld,Yusif Şərifzadə
Birləşmiş Ərəb Əmirlikləri, Qətər, Səudiyyə Ərəbistanı və Körfəz Əməkdaşlıq Şurası (GCC) Küveytdə yerləşən ABŞ hərbi bazasına edilən raket hücumunu qəti şəkildə pisləyib.
TurkicWorld xəbər verir ki, Birləşmiş Ərəb Əmirlikləri, Qətər və Səudiyyə Ərəbistanının xarici işlər nazirlikləri yaydıqları rəsmi bəyanatlarda hücumu Küveytin suverenliyinin “kobud şəkildə pozulması” kimi qiymətləndiriblər.
Yalnız BƏƏ açıqlamasında hücumlara görə İranı birbaşa məsul tərəf kimi göstərərək hadisəni “terror hücumu” adlandırıb.
Körfəz ölkələri bəyanatlarında Küveytlə “tam həmrəylik” ifadə etdiklərini və ölkənin təhlükəsizliyi, sabitliyi və suverenliyini qorumaq üçün atacağı bütün addımları dəstəklədiklərini bildiriblər.
Ayrı açıqlamada Körfəz Əməkdaşlıq Şurasının baş katibi Casim Məhəmməd əl-Budeyvi də ABŞ hərbi bazasına edilən hücumu qınayıb.
GCC-nin yaydığı bəyanatda qeyd olunub ki, “bu cür xəyanətkar hücumların davam etməsi beynəlxalq hüququn prinsiplərinin, BMT Nizamnaməsinin və mehriban qonşuluq prinsiplərinin açıq şəkildə pozulmasıdır”.
Baş katib həmçinin GCC ölkələrinin Küveytin təhlükəsizliyi, sabitliyi və vətəndaşlarının qorunması istiqamətində atdığı bütün addımları tam dəstəklədiyini vurğulayıb.
Son hadisələr Körfəz regionunda təhlükəsizlik narahatlıqlarını daha da artırıb. Ekspertlər bölgədə ABŞ, İran və Körfəz ölkələri arasında gərginliyin yeni mərhələyə keçə biləcəyi ilə bağlı xəbərdarlıq edirlər.
