BAKI, TurkicWorld
Avropa İttifaqının (Aİ) xarici siyasət və təhlükəsizlik məsələləri üzrə ali nümayəndəsi Kaya Kallas, İran və ABŞ arasında əldə olunan atəşkəs razılaşmasını regionda gərginliyi azaltmaq üçün mühüm fürsət kimi qiymətləndirib.
TurkicWorld xəbər verir ki, Kaya Kallas rəsmi bəyanatında bildirib ki, bu razılaşma raket zərbələrinin dayandırılması, təhdidlərin azaldılması və diplomatiyaya yol açılması üçün son dərəcə vacibdir.
Aİ rəsmisi vurğulayıb ki, beynəlxalq ticarətin təhlükəsizliyi üçün Hörmüz boğazı dərhal naviqasiya üçün yenidən açılmalıdır.
"İrandakı atəşkəs razılaşması raket atəşlərini dayandırmaq və dəniz nəqliyyatını bərpa etmək üçün böyük bir imkandır. Hörmüz boğazı gəmilərin hərəkəti üçün mütləq açılmalıdır."-deyə o qeyd edib.
Kaya Kallas Pakistanın xarici işlər naziri ilə telefon danışığı apardığını və bu ilkin razılaşmanın təmin edilməsində göstərdiyi diplomatik səylərə görə İslamabada təşəkkür etdiyini bildirib.
Buna baxmayaraq, Kallas xəbərdarlıq edib ki, müharibənin köklü səbəbləri hələ də həll olunmamış qalır:
"Vasitəçilik qapısı hər zaman açıq qalmalıdır, çünki müharibəyə səbəb olan əsas problemlər hələ də həllini tapmayıb."-deyə o bildirib.
