BAKI, TurkicWorld, Nailə Babazadə
İslam Əməkdaşlıq Təşkilatı (İƏT) bu cümə axşamı xarici işlər nazirləri səviyyəsində fövqəladə iclas keçirəcək.
TurkicWorld xəbər verir ki, Ciddə şəhərindəki baş qərargahda baş tutacaq toplantının əsas məqsədi İsrailin işğal altındakı İordan çayının qərb sahilində həyata keçirdiyi son tədbirlərə, o cümlədən yaşayış məskənlərinin genişləndirilməsi və aneksiya cəhdlərinə qarşı vahid mövqe nümayiş etdirməkdir.
Müzakirələrin mərkəzində İsrailin son vaxtlar "dövlət torpağı" bəhanəsi ilə İordan çayının qərb sahilində torpaqların məskunlaşdırılması prosedurlarına başlaması qərarı dayanır. İƏT rəsmiləri bildiriblər ki, bu addımlar Fələstin ərazilərinin hüquqi, siyasi və demoqrafik statusunu dəyişdirməyə yönəlmiş sistematik siyasətin tərkib hissəsidir.
Təşkilatın bəyanatında vurğulanır ki, İsrailin bu fəaliyyətləri beynəlxalq hüququn prinsiplərini pozmaqla yanaşı, münaqişənin "iki dövlətli həll" variantını tamamilə sarsıdır. Üzv dövlətlər bu addımların qarşısını almaq üçün beynəlxalq platformalarda atılacaq diplomatik və hüquqi addımları, həmçinin koordinasiya olunmuş təzyiq mexanizmlərini nəzərdən keçirəcəklər.
