BAKI, TurkicWorld, Nailə Babazadə
ABŞ-ın Virciniya ştatında yerləşən İran İnsan Haqları Aktivistləri Xəbər Agentliyi (HRANA) İranda 2025-ci il 28 dekabr tarixində başlayan etiraz aksiyalarında həlak olanların sayının 7 min 2 nəfərə çatdığını açıqlayıb.
TurkicWorld xəbər verir ki, məlumata görə, ölkənin müxtəlif bölgələrində keçirilən aksiyalar zamanı 52 min 941 nəfər saxlanılıb. Ölənlər arasında 214 təhlükəsizlik əməkdaşının da olduğu bildirilir. HRANA əlavə 11 min 730 hadisənin araşdırıldığını qeyd edib. Agentlik daha əvvəl ölənlərin sayını 6 min 984 nəfər olaraq açıqlamışdı.
Etirazlar 28 dekabr 2025-ci ildə milli valyutanın sürətlə dəyər itirməsi və iqtisadi problemlərin dərinləşməsi fonunda Tehranın Böyük Bazarında başlayaraq ölkə miqyasında yayılmışdı.
Yanvarın 8-də paytaxtda aksiyaların şiddətlənməsi nəticəsində hakimiyyət internetə çıxışı məhdudlaşdırmış, 8-9 yanvar tarixlərində təhlükəsizlik qüvvələri etirazları dağıtmışdı.
İran Şəhidlər və Qazilər Fondu isə 21 yanvar tarixli açıqlamasında, məhkəmə-tibbi məlumatlara əsaslanaraq, hadisələr zamanı 3 min 117 nəfərin öldüyünü bildirmişdi. Onlardan 2 min 427 nəfərin silahlı qruplar tərəfindən öldürüldüyü, 690 nəfərlə bağlı isə məlumat verilmədiyi qeyd olunmuşdu.
