BAKI, TurkicWorld, Nailə Babazadə
İranın ali lideri Ayətullah Əli Xameneyinin müşaviri Əli Laricani çərşənbə aqşamı nümayəndə heyəti ilə birlikdə Omana səfər edəcək.
TurkicWorld xəbər verir ki, bu barədə bazar ertəsi İranın "Tasnim" xəbər agentliyi məlumat yayıb. Səfərin regionda gərginliyin artdığı və diplomatik təmasların intensivləşdiyi bir vaxta təsadüf etməsi diqqət çəkir.
Ötən həftə Omanın vasitəçiliyi ilə ABŞ və İran diplomatları arasında dolayı danışıqlar baş tutub. Bu danışıqlar ABŞ-ın İran yaxınlığındakı dəniz qüvvələrini gücləndirdiyi və Tehranın hər hansı bir hücum qarşısında sərt cavab verəcəyini vəd etdiyi bir şəraitdə diplomatiyanı canlandırmağa xidmət edir. Laricaninin səfəri bu proseslərin davamı kimi qiymətləndirilir.
"Tasnim" agentliyinin məlumatına görə, Əli Laricani Oman Sultanlığının yüksək rütbəli rəsmiləri ilə görüşəcək. Görüşlər zamanı regional və beynəlxalq hadisələr, həmçinin müxtəlif səviyyələrdə ikitərəfli əməkdaşlıq məsələləri müzakirə olunacaq. Hazırda ABŞ və İran arasında növbəti raund danışıqların vaxtı və yeri barədə hələlik rəsmi məlumat verilməyib.
