BAKI, TurkicWorld
İran və ABŞ arasında nüvə proqramı ilə bağlı danışıqların dördüncü raundu başa çatıb.
TurkicWorld xəbər verir ki, tərəflər arasında Omanın paytaxtı Maskatda baş tutan görüş təxminən üç saat davam edib.
İranın xarici işlər naziri Abbas İrakçi danışıqları çətin, lakin məhsuldar adlandırıb.
Nazirin sözlərinə görə, tərəflər daha konkret mövzulara keçərək qarşılıqlı anlaşma baxımından əvvəlki mərhələlərlə müqayisədə daha irəlidədirlər. O bildirib ki, İranın uranı zənginləşdirmə fəaliyyətləri davam edəcək və bu məsələ heç bir halda müzakirə mövzusu ola bilməz.
ABŞ tərəfi isə İranın silaha yaxın zənginləşdirilmiş uran ehtiyatlarının artmasının qarşısını almağa çalışır. Bununla belə, İrakçi əvvəlki razılaşmalarda olduğu kimi, etimad yaratmaq üçün müəyyən məhdudiyyətlərin müzakirə oluna biləcəyini istisna etməyib.
Tərəflər növbəti görüş üçün razılığa gəliblər, lakin dəqiq tarix və yer hələlik müəyyən edilməyib.
Qeyd edək ki, danışıqlar ABŞ prezidenti Donald Trampın yaxın günlərdə Yaxın Şərqə gözlənilən səfəri ərəfəsində keçirilib. Danışıqlar həm birbaşa, həm də dolayı formatda aparılıb və əvvəlki raundlar kimi, bu dəfə də Omanın vasitəçiliyi ilə reallaşıb.
