Bakı,TurkicWorld
ABŞ-ın yeni seçilmiş prezidenti Donald Tramp, TikTok-un ölkədə qadağan edilməsini təxirə salmaq üçün Ali Məhkəməyə müraciət edib.
TurkicWorld xəbər verir ki, o , qadağanın siyasi həll yolu tapılana qədər təxirə salınmasını istəyib. TikTok-un ana şirkəti ByteDance ilə əlaqələri səbəbindən tətbiq olunan bu qanunun milli təhlükəsizlik riski yaratdığı Bayden administrasiyası tərəfindən iddia olunur.
Belə ki , TikTok , ByteDance ilə əlaqələrini qırma tələbini yerinə yetirmək üçün vaxtın kifayət etmədiyini bildirir. Tramp və onun hüquq komandası, qadağa tarixinin onun vəzifəyə başlamasından bir gün əvvəl - 19 yanvar 2025-ci il tarixinə təsadüf etdiyini qeyd edərək, qanunun icrasının təxirə salınmasını istəyiblər.
Bayden administrasiyası isə TikTok-un Çindəki texnoloji infrastruktura və ByteDance ilə inteqrasiya olunmuş korporativ strukturuna görə milli təhlükəsizlik üçün risk daşıdığını iddia edir. Administrasiya rəsmiləri, Çin hökumətinin TikTok-dan istifadə edərək məlumat toplamaq və ya yaymaq üçün təzyiq göstərə biləcəyindən narahatdır.
TikTok-un hüquqi müdafiəsi isə bu narahatlıqların gələcək ehtimallara əsaslandığını və hökumətin bu riski sübut edə bilmədiyini irəli sürür. Şirkət, qadağanın ABŞ Konstitusiyasının 1-ci maddəsinə zidd olduğunu bildirərək, qanunun ləğvi üçün hüquqi mübarizəni davam etdirir.
Qeyd edək ki, Tramp, prezidentlik kampaniyası dövründə TikTok-da fəal olub və platformanı gənc seçicilərlə əlaqə qurmaq üçün istifadə edib. O, milli təhlükəsizliklə bağlı narahatlıqların mövcud olduğunu qəbul etsə də, TikTok-un qadağan edilməsinin əleyhinə olduğunu ifadə edib.
Ali Məhkəmə, TikTok-un ABŞ-dakı gələcəyi ilə bağlı hüquqi dinləmələri 2025-ci ilin yanvar ayında keçirəcək. Bu müddət ərzində TikTok-un qadağası və ya ByteDance ilə əlaqələrinin kəsilməsi məsələsi müzakirə olunacaq.
