BAKI, TurkicWorld , Nailə Babazadə
Birləşmiş Ərəb Əmirlikləri (BƏƏ) və Özbəkistan arasında Özbəkistanın dağ-mədən sektorunun inkişafını dəstəkləmək, dayanıqlı artımı təşviq etmək və uzunmüddətli iqtisadi dəyər yaratmaq məqsədilə mühüm anlaşma memorandumu imzalanıb.
TurkicWorld xəbər verir ki, BƏƏ-nin rəsmi agentliyi WAM-ın verdiyi məlumata görə, sənəd Əbu-Dabidə BƏƏ-nin İnvestisiya naziri Məhəmməd Həsən əs-Suveydi və Özbəkistan Baş nazirinin müavini Cəmşid Xocayev tərəfindən imzalanıb. Bu razılaşma kəşfiyyat və hasilat işlərindən başlayaraq son məhsulun istehsalına qədər olan bütün dağ-mədən dəyər zənciri boyunca investisiya fəaliyyətlərini əhatə edir.
Anlaşma çərçivəsində hökumətlər, dövlət investisiya şirkətləri və özəl sektor arasında xüsusi investisiya fondları və peşəkar qurumlar vasitəsilə əməkdaşlıq üçün institusional baza yaradılıb. Memorandumda həmçinin enerji istehsalı, bərpa olunan enerji həlləri, elektrik şəbəkələri, su sistemləri, nəqliyyat qovşaqları və logistik infrastrukturun inkişafı daxil olmaqla, sektorun dəstəkləyici infrastrukturunun modernləşdirilməsinə üstünlük verilir. Sənədin əsas hədəflərindən biri də sənayenin rəqəmsallaşdırılmasını təşviq etmək, innovasiyaları dəstəkləmək və məsuliyyətli idarəetmə prinsipləri vasitəsilə uzunmüddətli dayanıqlığı gücləndirməkdir.
BƏƏ ilə Özbəkistan arasındakı iqtisadi münasibətlər ikitərəfli investisiyaların güclü dinamikası sayəsində sürətlə inkişaf edir. Məlumata görə, BƏƏ-nin Özbəkistandakı investisiyaları 2024-cü ildə təxminən 1,3 milyard dollara çatıb ki, bunun da 700 milyon dolları bərpa olunan enerji layihələrinə yönəldilib. Hazırda iki ölkə arasında işlənib hazırlanan birgə layihələrin ümumi dəyərinin isə 4 milyard dolları ötdüyü vurğulanır.
