Bakı.TurkicWorld:
Gücləndirilmiş əlaqə Asiya boyunca davamlı inkişafı dəstəkləyəcəkdir. Davamlı inkişaf həm də ekoloji çağırışlara qarşı addımlar atılmasını tələb edir. Türkiyə iqlim dəyişikliyinin təsirləri ilə mübarizə səylərinə liderlik etməyə davam edir.
TurkicWorld-un tədbirdəki müxbiri xəbər verir ki, bu barədə Türkiyənin xarici işlər naziri Hakan Fidan cümə axşamı Asiyada Qarşılıqlı Fəaliyyət və Etimad Tədbirləri üzrə Məşvərət Şurasının (AQEM) Yeddinci Sammitində çıxışı zamanı bildirib.
O qeyd edib ki, Türkiyə bu Zirvənin iqlim ədalətini, davamlı inkişafı və insanmərkəzli transformasiyanı gücləndirmək üçün bir fürsət olmasını istəyir.
"Qarşıdakı Liderlər Zirvəsində bütün əlaqədar maraqlı tərəflərin yüksək səviyyədə iştirakına çağırırıq. Günümüzün böyüyən böhranları beynəlxalq arenada qeyri-müəyyənliyə yol açır. Kollektiv həllər tapmaq ümumi çağırışlarımız üçün hər zamankindən daha vacibdir və bu çox ehtiyac duyulan çoxtərəfli fəaliyyət qarşısındakı ən böyük maneə beynəlxalq aktorlar arasında etimadsızlıqdır.
Bir həll yolu olaraq, prioritetimiz regional mülkiyyət əsasında əməkdaşlığı təkmilləşdirmək yolu ilə qarşılıqlı etimadı gücləndirmək üçün dialoq mədəniyyəti qurmaqdır", – deyə o bildirib.
Qeyd edək ki, Azərbaycanın Sədrliyi ilə Bakıda Asiyada Qarşılıqlı Fəaliyyət və Etimad Tədbirləri üzrə Məşvərət Şurasının (CİCA) Yeddinci Sammiti keçirilir.
İclasda 2022-ci ildə AQEM-in transformasiyasına start verildikdən bəri əldə olunmuş inkişaf, eləcə də Azərbaycanın Sədrliyinin təşkilatın möhkəmləndirilməsi və Üzv Dövlətlər arasında praktiki əməkdaşlığın irəlilədilməsi sahəsindəki nailiyyətləri nəzərdən keçiriləcək.
Tədbirdə dövlət və hökumət başçıları, AQEM-ə üzv dövlətlərin, müşahidəçi dövlətlərin, müşahidəçi təşkilatların və tərəfdaş qurumların nümayəndə heyətləri iştirak edirlər.
Sammit beynəlxalq münasibətlərdə, o cümlədən Asiyada dövlətlərarası ziddiyyətlərin kəskinləşdiyi, münaqişələrin alovlandığı və yeni münaqişə ocaqlarının yaranması ilə müşahidə olunan mürəkkəb mühitdə üzv dövlətlər arasında dialoq və etimad quruculuğu məsələlərinin müzakirəsi üçün mühüm fürsət təşkil edir.
Laosun yeni üzv qismində AQEM-ə qəbul edilməsi sammitin ən əlamətdar nəticələrindən biri hesab olunur. Tədbir AQEM çərçivəsində fəaliyyətin təşviqi və ayrı-ayrı istiqamətlər üzrə əməkdaşlığın təkmilləşdirilməsi istiqamətində sənədlərin qəbulu ilə əlamətdar olacaq.
Sammitin ən mühüm siyasi sənədi kimi Bakı Bəyannaməsinin qəbulu gözlənilir. Sənəddə Azərbaycanın AQEM-ə sədrliyi bütün dövlətlər tərəfindən təqdir edilir, iki il ərzində müxtəlif istiqamətlər üzrə irəli sürülmüş təşəbbüslər və keçirilmiş tədbirlər alqışlanır. Sənəddə həmçinin, beynəlxalq nizamın təşviqi, hərbi-siyasi, iqtisadi, ətraf mühit kimi sahələrdə risklərlə mübarizə yollarına dair konkret müddəalar öz əksini tapır. Bakı Bəyannaməsində dözümlülük və sivilizasiyalar arası dialoqun təşviqi, təhlükəsizlik və rifah naminə elm, təhsil və innovasiyalardan istifadənin irəlilədilməsi, o cümlədən süni intellektin inkişafından qaynaqlanan imkan və risklərə xüsusi diqqət yetirilir.
Bakı Bəyannaməsindən əlavə, sammitdə Əməyin təhlükəsizliyi və sağlamlığı mövzusunda ayrıca bəyanatın da qəbulu nəzərdə tutulur.
