BAKI, TurkicWorld, Orxan Qədirzadə
Türkiyə Milli Kəşfiyyat Təşkilatı (MİT) tərəfindən həyata keçirilən xüsusi əməliyyat nəticəsində İŞİD terror təşkilatının intihar aktı törətmək üçün tapşırıq verdiyi Mehmet Gören Əfqanıstan–Pakistan bölgəsində saxlanılaraq Türkiyəyə gətirilib.
TurkicWorld-un məlumatına görə, MİT-in apardığı kəşfiyyat tədbirləri çərçivəsində Əfqanıstan–Pakistan bölgəsində İŞİD-in tərkibində fəaliyyət göstərən türk mənşəli şəxsin olduğu müəyyən edilib. Araşdırmalar zamanı məlum olub ki, sözügedən şəxs İŞİD-ə məxsus düşərgələrdə aktiv fəaliyyət göstərib və zamanla təşkilat daxilində rəhbər vəzifəyə qədər yüksəlib.
Müəyyən edilib ki, “Yahya” kod adlı Mehmet Gören əvvəllər Türkiyədən Əfqanıstan–Pakistan bölgəsinə terror təşkilatı üzvlərinin ötürülməsində fəal rol oynayan və “Abu Yasir Al Turki” kod adlı Özgür Altunla birgə fəaliyyət göstərib. Qeyd edək ki, Özgür Altun daha əvvəl saxlanılaraq Türkiyəyə gətirilib və həbs edilib.
MİT-in əldə etdiyi məlumatlara əsasən, Mehmet Gören Əfqanıstan, Pakistan, Türkiyə və Avropada mülki şəxslərə qarşı intihar aktı törətməyə razılıq verib. Terrorçunun bölgədəki mövcud yeri dəqiqləşdirildikdən sonra əməliyyat həyata keçirilib və o, Türkiyəyə gətirilib.
Araşdırmalar zamanı Mehmet Görenin Türkiyədən Əfqanıstan–Pakistan bölgəsinə keçdiyi, İŞİD düşərgələrində fəaliyyət göstərərək rəhbər vəzifəyə yüksəldiyi, eləcə də Pakistanda İŞİD mövqelərinə qarşı həyata keçirilən hava zərbələrindən sağ çıxdığı müəyyən olunub.
Terrorçunun ifadəsində Türkiyədən bölgəyə terrorçu ötürülməsini təşkil edən Özgür Altunla əlaqələri, İŞİD tərkibində aldığı silahlı və dini təlimlər, həmçinin təşkilat adından intihar aktı həyata keçirmək üçün verilən tapşırıqlar barədə məlumatlar yer alıb.
MİT-in həyata keçirdiyi əməliyyat nəticəsində İŞİD-in Türkiyəyə qarşı planlaşdırdığı terror aktlarının qarşısı alınıb, təşkilatın üzv toplama fəaliyyəti ifşa edilib və terror planları zərərsizləşdirilib.
