Bakı. TurkicWorld:
Türkiyənin energetika və təbii sərvətlər naziri Alparslan Bayraktar Rusiyaya səfər edib.
TurkicWorld xəbər verir ki, nazir Bayraktar bu barədə öz rəsmi X (Twitter) sosial media hesabında bildirib.
Məlumata əsasən, görüş çərçivəsində Bayraktar Rusiyanın Dövlət Atom Enerjisi Korporasiyası "Rosatom" rəhbəri Aleksey Lixaçevlə Akkuyu AES-in ən qısa zamanda istifadəyə verilməsi üçün görülən işləri müzakirə edib.
"2053-cü il neytral karbon hədəfinə nail olmaq üçün nüvə enerjisi mühüm resurs olmağa davam edəcək", - deyə o əlavə edib.
Qeyd edək ki, Akkuyu Atom Elektrik Stansiyası 2010-cu il mayın 12-də Türkiyə və Rusiya prezidentləri arasında imzalanmış müqavilə çərçivəsində Türkiyənin Mersin vilayətinin Büyükeceli bölgәsindә tikilib.
2018-ci ilin aprel ayında birinci reaktorun, 2020-ci ilin iyun ayında ikinci reaktorun, 2021-ci ilin mart ayında üçüncü reaktorun, 2022-ci ilin iyun ayında isə sonuncu reaktorun təməli qoyulub.
Aprelin 27-də Atom Elektrik Stansiyasına ilk yanacaq yüklənib.
Ümumi gücü 4 min 800 meqavat olan dörd blokdan ibarət Akkuyuda dörd reaktorun bir il fərqlə istifadəyə verilməsi planlaşdırılır. Dörd reaktorun istismara verildiyi zaman ildə cəmi 35 milyard kilovat-saat elektrik enerjisi istehsal ediləcək və Türkiyənin elektrik enerjisinə ehtiyacının təxminən 10 faizini qarşılayacağı gözlənilir. AES ilə ildə 17 milyon ton karbon emissiyasının qarşısı alınacaq.
Ləman Əsədli
Lamanasadli01