BAKI,TurkicWorld
Azərbaycan, Türkiyə və Özbəkistan hərbçilərinin iştirakı ilə keçirilən “Birliyin Gücü – 2026” birgə hərbi təlimi çərçivəsində növbəti praktiki tapşırıqlar yerinə yetirilib.
TurkicWorld xəbər verir ki, bu barədə Azərbaycan Respublikasının Müdafiə Nazirliyi məlumat yayıb.
Bildirilib ki, təlim planına uyğun olaraq iştirakçı ölkələrin hərbi bölmələri helikopterlərdən desantın endirilməsi, operativ mövqelərin tutulması və şərti terrorçu qruplaşmalarının zərərsizləşdirilməsi üzrə fəaliyyətləri uğurla həyata keçiriblər.
Tapşırıqların icrası zamanı Azərbaycan, Türkiyə və Özbəkistandan olan hərbi qulluqçular arasında yüksək səviyyədə qarşılıqlı əlaqə və koordinasiya nümayiş etdirilib.
Təlimin əsas məqsədlərindən biri iştirakçıların praktiki bacarıqlarının artırılması, müxtəlif bölmələrin birgə fəaliyyət imkanlarının inkişaf etdirilməsi və qarşıya qoyulan tapşırıqların effektiv şəkildə yerinə yetirilməsidir.
Məşqlər zamanı həmçinin aviasiya vasitələrinin şəxsi heyətlə uzlaşdırılmış fəaliyyətinin təmin edilməsinə xüsusi diqqət ayrılıb.
“Birliyin Gücü – 2026” təliminin keçirilməsi iştirakçı ölkələrin hərbi əməkdaşlığının inkişaf etdirilməsi və birgə fəaliyyət imkanlarının təkmilləşdirilməsi məqsədi daşıyır.
Təlim çərçivəsində müxtəlif ssenarilər üzrə praktiki məşqlərin davam etdirilməsi nəzərdə tutulur.
