BAKI,TurkicWorld,Yusif Şərifzadə
“Rosneft”in baş direktoru İqor Seçin ABŞ şirkətlərinin Hörmüz boğazındakı gərginlikdən strateji və maliyyə baxımından faydalandığını bildirib.
TurkicWorld xəbər verir ki, Seçin Sankt-Peterburq Beynəlxalq İqtisadi Forumunda çıxışı zamanı ABŞ neft və qaz şirkətlərinin bu vəziyyətdən “rəqabətsiz üstünlüklər” və yüksək qiymətə təchizat satmaq imkanları qazandığını vurğulayıb.
Norveçin Rystad Energy konsaltinq şirkətinin hesablamalarına istinad edən Seçin bildirib ki, neftin barreli təxminən 100 dollar səviyyəsində qaldığı halda, ABŞ-ın neft və qaz şirkətləri 2026-cı ildə əlavə 60 milyard dollardan çox gəlir əldə edə bilər. Onun sözlərinə görə, bu sektor üzrə əlavə vergi gəlirləri isə təxminən 80 milyard dollar təşkil edə bilər.
Seçin həmçinin Çin şirkətlərinin Hörmüz boğazındakı potensial pozuntulara digər ölkələrdən daha yaxşı hazır olduğunu qeyd edib. Bunun səbəbi olaraq Çinin enerji təhlükəsizliyi və uzunmüddətli dövlət planlamasında balanslı yanaşmasını göstərib. O bildirib ki, Çin bərpa olunan enerji və ucuz nəqliyyat infrastrukturuna sərmayələr qoyaraq istehlakçılara elektrik avtomobilləri, elektrik avtobusları, qazla işləyən yük maşınları, metro, elektrik qatarları və elektrik taksiləri kimi alternativlər təqdim edib.
Seçin bildirib ki, bölgədə gərginlik ABŞ və İsrailin İrana qarşı zərbələrindən sonra fevral ayında artıb. Bu gərginlik qisas hücumları ilə davam edib və dəniz nəqliyyatı vasitəsilə qlobal enerji təminatı üçün təhlükə yaradıb. Sonradan İran İsrailə hücumlar həyata keçirib, ABŞ hərbi bazalarının yerləşdiyi ölkələr hədəfə alınıb və Hörmüz boğazında dəniz hərəkəti pozulub. Nəticədə atəşkəs qüvvəyə minib, lakin diplomatik səylər daha geniş həll üçün davam etdirilir.
