Bakı. Trend:
İtaliyanın Augusta limanında CIF bazisi üzrə Azərbaycanın "Azeri Light" markalı neftinin qiyməti əvvəlki göstərici ilə müqayisədə 3,11 ABŞ dolları və ya 2,98 faiz artaraq bir barel üçün 107,31 ABŞ dollarına çatıb.
Bu barədə neft bazarı iştirakçılarının məlumatında bildirilib.
Qeyd olunub ki, Türkiyənin Ceyhan limanında FOB bazisi üzrə "Azeri Light" markalı neftin bir barelinin qiyməti 3,18 ABŞ dolları və ya 3,15 faiz artaraq 104,23 ABŞ dolları təşkil edib.
"Urals" markalı xam neftin qiyməti əvvəlki göstərici ilə müqayisədə 3,34 ABŞ dolları və ya 4,27 faiz artaraq bir barel üçün 81,60 ABŞ dollarına çatıb.
Şimal dənizində hasil edilən "Dated Brent" markalı neftin qiyməti isə əvvəlki göstərici ilə müqayisədə 5,67 ABŞ dolları və ya 5,62 faiz artaraq bir barel üçün 106,51 ABŞ dolları olub.
Azərbaycanın 2026-ci il dövlət büdcəsində bir barel neftin orta qiyməti 65 ABŞ dolları səviyyəsində hesablanıb.
"Trading Economics"in məlumatına görə, xam neftin qiyməti çərşənbə axşamı bir barel üçün 92 dollardan yuxarı səviyyədə qalıb və son üç ayın ən yüksək göstəricisi ətrafında dəyişib. Bildirilib ki, buna səbəb İranın Omanla Hörmüz boğazından gəmiçilik fəaliyyətinin idarə olunması ilə bağlı razılaşmanın yekunlaşmaq üzrə olduğunu açıqlaması və bunun Tehranın strateji su yoluna nəzarətinin artması ilə bağlı narahatlıqları gücləndirməsidir.
"Bazar iştirakçıları həftəsonu ABŞ-nin Hörmüz boğazında İran tankerlərinə zərbələr endirməsindən sonra Vaşinqtonun hansı addımı atacağını da diqqətlə izləyirlər.
ABŞ ilə İran arasında döyüşlərin yenidən başlaması Yaxın Şərqdən enerji tədarükündə mümkün fasilələrlə bağlı narahatlıqları artırdığından, ötən həftə neftin qiyməti təxminən 10% yüksəlib. Hər iki tərəf həftəsonu hücumlarını gücləndirərək Hörmüz boğazı ətrafında gəmiləri və hərbi-dəniz qüvvələrinə məxsus vasitələri hədəfə alıb.
Səudiyyə Ərəbistanının "Saudi Aramco" şirkətinin Qırmızı dəniz yaxınlığındakı Cizan şəhərində yerləşən obyektləri də bazar ertəsi yenidən hücuma məruz qalıb. Bununla belə, obyektlərə dəyən zərər məhdud olub.
Artan risklərə baxmayaraq, Fars körfəzindən neft tədarükü davam edir. Məlumata görə, hər gün təxminən 7 milyon barel xam neft və neft məhsulu Hörmüz boğazından keçərək daşınır", - məlumatda qeyd edilib.
