BAKI,TurkicWorld
Azərbaycanın coğrafi mövqeyi, Xəzər dənizinə çıxışı və son illərdə həyata keçirdiyi iri infrastruktur layihələri ölkəni regionun nəqliyyat və ticarət əlaqələrinin əsas mərkəzlərindən birinə çevirir.
Türkiyənin ticarət nazirinin müavini Sezai Uçarmak Azərbaycanın regional nəqliyyat və logistika imkanlarının genişləndirilməsində mühüm rol oynadığını bildirib.
O, bunu “Azərbaycan Cənubi Qafqaz–Mərkəzi Asiya strateji tərəfdaşlıqlarının mərkəzində: Regional əməkdaşlığın əsas hərəkətverici qüvvəsi” mövzusunda paneldə çıxışı zamanı deyib.
Zəngəzur dəhlizi regionun xəritəsini dəyişə bilər
Sezai Uçarmak Azərbaycan və Türkiyənin son illərdə həm infrastruktur, həm də iqtisadi əməkdaşlıq sahəsində mühüm nəticələr əldə etdiyini qeyd edib.
Onun sözlərinə görə, Bakı-Tbilisi-Qars dəmir yolu, eləcə də Zəngəzur dəhlizi çərçivəsində nəzərdə tutulan dəmir yolu və avtomobil yolu layihələri regionun nəqliyyat imkanlarının daha da genişləndirilməsi baxımından xüsusi əhəmiyyət daşıyır.
Türkiyənin Qars-İğdır istiqamətində həyata keçirdiyi layihələrin də beynəlxalq yükdaşımaların inkişafına töhfə verəcəyini deyən Uçarmak bildirib ki, Azərbaycan, Türkiyə, Gürcüstan, Özbəkistan, Türkmənistan və Qırğızıstan kimi ölkələr nəqliyyat infrastrukturunun inkişafına müxtəlif layihələrlə töhfə verirlər.
“Azərbaycan-Ermənistan münasibətlərinin normallaşması və sülh müqaviləsinin imzalanması regionda nəqliyyat əlaqələrinin daha da inkişafına imkan yarada bilər. Bu, Türkiyə və Azərbaycan arasında, eləcə də Şərq-Qərb istiqamətində yeni nəqliyyat və logistika imkanlarının formalaşmasına şərait yaradacaq”, – deyə nazir müavini vurğulayıb.
40 milyard dollarlıq iqtisadi əlaqə
Sezai Uçarmak Azərbaycan-Türkiyə iqtisadi münasibətlərinin miqyasının qarşılıqlı investisiyaların həcmi ilə də özünü göstərdiyini bildirib.
Onun sözlərinə görə, hazırda Azərbaycanda 7 mindən çox türk şirkəti fəaliyyət göstərir. Türkiyədə isə 3 mindən çox, təxminən 3 200 Azərbaycan şirkəti investisiya fəaliyyəti həyata keçirir.
“İki ölkə arasında qarşılıqlı investisiyaların ümumi həcmi təxminən 40 milyard dollara çatır. Bu göstəricilər Azərbaycan və Türkiyə arasında iqtisadi münasibətlərin geniş miqyasını nümayiş etdirir”, – deyə Uçarmak qeyd edib.
İnvestor üçün sabitlik və şəffaflıq əsas şərtdir
Türkiyəli nazir müavini investisiyaların artırılması üçün biznes mühitində aydın və əvvəlcədən müəyyən edilmiş qaydaların vacibliyinə də diqqət çəkib.
O bildirib ki, investorlar vergi, gömrük, ixrac və digər prosedurlar üzrə sabit və şəffaf qaydaların mövcudluğunda maraqlıdırlar.
“İnvestisiya qoyuluşu edən insanlar əsas qaydaların əvvəlcədən müəyyənləşdirilməsini və aydın şəkildə təqdim olunmasını istəyirlər. İnvestor üçün sabit və şəffaf mühitin yaradılması mühüm əhəmiyyət daşıyır”, – deyə Uçarmak bildirib.
O, nəqliyyat sahəsində də məsuliyyət bölgüsünün aydın müəyyənləşdirilməsinin vacibliyini vurğulayıb. Onun sözlərinə görə, yükün özü ilə bağlı yaranan problemlə daşıyıcı şirkətin məsuliyyəti bir-birindən fərqləndirilməlidir. Əks halda yaranan əlavə xərclər nəqliyyat tariflərinin artmasına səbəb ola bilər.
“Orta Dəhliz qarşıdakı dövrdə mühüm rol oynayacaq”
Sezai Uçarmak Orta Dəhlizin qarşıdakı illərdə Şərqlə Qərb arasında ticarət və nəqliyyat əlaqələrinin inkişafında mühüm rol oynayacağını bildirib.
O qeyd edib ki, dəhlizin səmərəli fəaliyyət göstərməsi üçün iştirakçı ölkələrin yalnız infrastruktur layihələrinə investisiya yatırması kifayət deyil. Qarşılıqlı fayda, rentabellik və məhsuldarlıq da əsas prinsiplər kimi nəzərə alınmalıdır.
“Regional sabitlik investisiyaların cəlb edilməsi üçün mühüm şərtdir. İnvestorlar qərar qəbul edərkən ilk növbədə sabitlik, hüquqi təminatlar və müəyyən edilmiş qaydaların mövcudluğuna diqqət yetirirlər”, – deyə o vurğulayıb.
İstehsal sahəsində yeni imkanlar
Türkiyənin ticarət nazirinin müavini Azərbaycan və Türkiyə arasında qarşılıqlı investisiyaların gələcəkdə daha da artacağına əminliyini ifadə edib.
O, xüsusilə istehsal və digər real iqtisadiyyat sahələrində əməkdaşlığın genişləndirilməsinin iki ölkənin iqtisadi əlaqələrinə əlavə dinamizm qazandıra biləcəyini bildirib.
Beləliklə, Bakı-Tbilisi-Qars və Zəngəzur dəhlizi kimi layihələrlə nəqliyyat bağlantılarının genişləndirilməsi, Orta Dəhlizin imkanlarının artırılması və qarşılıqlı investisiyaların yüksəldilməsi Azərbaycan-Türkiyə iqtisadi tərəfdaşlığının növbəti mərhələsində əsas istiqamətlərdən biri kimi önə çıxır.
