Bakı,TurkicWorld:
Qarabağ bölgəsi alternativ və "yaşıl" enerji zonasına çevrilir.
TurkicWorld xəbər verir ki, bu barədə iqtisadiyyat nazirinin müavini Anar Axundov Laçında "Malıbəy" KSES-in təməlqoyma mərasimində deyib.
"Bu gün işğaldan azad edilmiş ərazilərin inkişafı məsələsi xüsusi əhəmiyyət kəsb edir. Azərbaycan Respublikasının Prezidenti İlham Əliyevin rəhbərliyi altında işğaldan azad edilmiş torpaqlarımıza "Böyük Qayıdış" proqramı uğurla həyata keçirilir. Region alternativ və "yaşıl" enerji zonasına çevrilir. Bu istiqamətdə özəl investorlarla əməkdaşlıq aktiv şəkildə inkişaf edir", - o deyib.
Qeyd edək ki, iyunun 1-də Laçında "Malıbəy" kiçik su elektrik stansiyasının təməlqoyma mərasimi olub.
Xatırladaq ki, ötən ilin dekabr ayında "Azərbaycan İnvestisiya Şirkəti" ASC, "Demirören Yatırım Holding A.Ş." şirkətlər qrupu (Türkiyə) və "Arges Enerji Team" MMC arasında Birgə İştirak Müqaviləsi imzalanıb. Müqaviləyə əsasən, Hekəri və Tərtər çayları üzərində beş KSES istifadəyə veriləcək.
Layihənin ümumi dəyəri 25 milyon manatdır. Bütünlükdə 2025-ci ildə, ümumi gücü 13,8 meqavatt olan beş stansiyanın istismara verilməsi planlaşdırılır. Stansiyaların istismar müddəti 30 ildir. Layihənin icrası 25 yeni iş yerinin açılmasına imkan verəcək.
Layihənin 1-ci mərhələsində Laçın rayonu ərazisində Zabux çayı üzərində 5,1 meqavatt gücündə "Malıbəy" SES-in, 2-ci mərhələdə 3,4 meqavatt gücündə "Qalaça 2" SES, 1,8 meqavattlıq "Minkənd" SES və 1,1 meqavatt gücündə "Qalaça 1" SES-in tikintisi planlaşdırılır. 3-cü mərhələdə Kəlbəcər rayonunda Tərtər çayının üzərində 2,4 meqavattlıq "Tərtər 1" KSES-in tikintisi nəzərdə tutulur.
