BAKI,TurkicWorld
Böyük Britaniyanın daxili təhlükəsizlik xidməti (MI5) İranın ölkə ərazisində hərbi obyektlərə qarşı hücum cəhdlərini artırdığı barədə xəbərdarlıq edib. Kəşfiyyat qurumunun rəhbəri Ken Makkallum Tehranın daha ciddi şəkildə qorunan obyektləri hədəfə almağa çalışdığını bildirib.
TurkicWorld xəbər verir ki, Ken Makkallum bu barədə Böyük Britaniyanın üzləşdiyi təhlükələrə həsr olunmuş illik çıxışında danışıb. O, xüsusilə hərbi hava bazalarına qarşı mümkün hücum cəhdlərindən narahatlığını ifadə edib.
Britaniyanın Baş naziri Endi Börnem oktyabrın 12-də bildirib ki, sentyabr ayında Feyrford hərbi hava bazasına qarşı hazırlandığı ehtimal edilən hücum planının arxasında böyük ehtimalla İran dayanır.
Qeyd edək ki, ABŞ hərbi təyyarələri İran ərazisinə zərbələr endirmək üçün Böyük Britaniyadakı Feyrford hərbi hava bazasından istifadə ediblər.
Makkallum hadisə ilə bağlı araşdırmanın davam etdiyini əsas gətirərək təfərrüatları açıqlamayıb. Bununla belə, o, İranın bu il hərbi obyektlər kimi daha ciddi qorunan hədəflərə yönəlmək cəhdlərində əhəmiyyətli artım müşahidə olunduğunu bildirib.
Kəşfiyyat rəhbərinin sözlərinə görə, Feyrford bazası ətrafında baş verən hadisə yeganə belə hal deyil. Oxşar təhlükələr təkcə Böyük Britaniyada deyil, dünyanın digər bölgələrində də qeydə alınıb.
İran isə Britaniyadakı hərbi hava bazası ilə bağlı ittihamları rədd edərək hadisədə iştirakının olmadığını bildirib.
