BAKI,TurkicWorld,Yusif Şərifzadə
Livan Prezidenti Cozef Aun İsrail ordusunun yeni hücumları ilə bağlı narahatlıqların artdığı bir vaxtda ölkənin cənubundakı Nəbatiyyə şəhərinə nadir səfər edib. Şəhər İsrail qüvvələrinin bu ayın əvvəlində strateji mövqeləri ələ keçirdiyi Əli ət-Tahir yüksəkliyinin yaxınlığında yerləşir.
TurkicWorld xəbər verir ki, Aunun səfəri İsrail ordusunun Əli ət-Tahir yüksəkliyinin bir hissəsini nəzarətə götürməsindən sonra baş tutub. İsrail rəsmiləri bölgədə Hizbullaha aid olduğunu bildirdikləri tunel şəbəkələrinin partladıldığını açıqlayıblar.
Bu hadisələr İsrail ilə Hizbullah arasında ABŞ-nin vasitəçiliyi ilə iyunun 20-də əldə edilmiş atəşkəs razılaşmasına baxmayaraq baş verib.
Yerli televiziya kanallarında yayımlanan görüntülərdə Nəbatiyyə sakinlərindən biri Auna insanların təhlükəsiz yaşamaq və övladlarının qorunduğuna əmin olmaq istədiklərini bildirib. Sakin məcburi köçkün vəziyyətinə düşdüklərini və ağır şəraitlə üzləşdiklərini qeyd edib.
Aun isə dövlətin yerli əhalinin ehtiyaclarını diqqətdə saxlayacağını bildirib. “Burada qalmağınız üçün ehtiyaclarınızı diqqətdə saxlayacağıq”, – Livan Prezidenti deyib.
İsrail və Hizbullah arasında son müharibə nəticəsində Livanda 4 mindən çox insanın öldüyü, təxminən bir milyon nəfərin isə yaşayış yerini tərk etmək məcburiyyətində qaldığı bildirilir.
